Qazaqstannyń joǵary oqý oryndarynda oqıtyn etnıkalyq qazaqtarǵa azamattyq jeńildetilgen tártippen beriledi - G. Seıtmaǵanbetova

ASTANA. QazAqparat - Qazaqstannyń joǵary oqý oryndarynda oqıtyn etnıkalyq qazaq stýdentterine azamattyq jeńildetilgen tártippen beriletin bolady. Bul týraly búgin Májilistiń jalpy otyrysynda depýtat Gúlnár Seıtmaǵanbetova málim etti. Eske salaıyq, jalpy otyrysta depýtattar «Qazaqstan Respýblıkasynyń keıbir zańnamalyq aktilerine halyqtyń kóshi-qony jáne jumyspen qamtylýy máseleleri boıynsha ózgerister men tolyqtyrýlar engizý týraly» zań jobasyn ekinshi oqylymda maquldaǵan edi.

«Qujatty ekinshi oqylymǵa ázirleý barysynda depýtattar tarapynan birqatar túzetýler engizildi. Máselen, shetelderdegi daryndy etnıkalyq qazaq jastarynyń elimizge kelýin jáne Qazaqstan azamattyǵyn alýyn yntalandyrý maqsatynda Qazaqstandaǵy joǵary oqý oryndarynda oqıtyn etnıkalyq qazaq stýdentterine jeńildetilgen tártippen Qazaqstan Respýblıkasynyń azamattyǵyn alý quqyǵy usynylyp otyr. Budan bólek, Qazaqstanda turatyn oralmandar men sheteldikterge vızany uzartý máselesin jeńildetetin, ıaǵnı vızany ishki ister organdary arqyly uzartýǵa múmkinshilik beretin normalar qabyldandy. Buryn qandastarymyz óz vızalaryn ózderi kelgen memelketterine qaıta baryp qana uzartatyn edi», - deıdi Májilis depýtaty Gúlnár Seıtmaǵanbetova.

Onyń aıtýynsha, otbasylaryn biriktirý maqsatynda shet elderde turatyn etnıkalyq qazaqtardyń arasyndaǵy týystaryn Qazaqstan Respýblıkasyna qonystandyrý úshin azamattardyń shaqyrtýlaryn qaraıtyn jáne kýálandyratyn quzyret jergilikti atqarýshy organdarǵa beriledi. Oralmandardyń Qazaqstanda turaqty turýǵa arnalǵan ruqsatty alý kezindegi keıbir kedergiler de jeńildetilgen.

«Atap aıtqanda, buryn bir ret quqyq buzǵan jaǵdaıda oralmandarǵa ruqsat berilmese, endi zań jobasymen birneshe ret quqyq buzýshylyq bolǵan jaǵdaıda ǵana ruqsat berilmeıtindeı norma usynylyp otyr. Oralmandardyń Qazaqstan azamattyǵyn alǵanǵa deıin Jeke sáıkestendirý nómirleriniń (JSN) bolmaýynan balalaryn mektepke, balabaqsha ornalastyrýda, emhana men aýrýhanalarda tirkelýge, zeınetaqy jarnalaryn jáne áleýmettik tólemderdi aýdarýda qıyndyqtar bolyp turǵan. Osyǵan oraı, endi JSN oralman mártebesin alǵan kúnnen bastap beriletin bolyp otyr. ıAǵnı, oralman kýáligi JSN bar qujattar tizbesine engizilmekshi. Oralmandarǵa qyzmettik nemese jeke turǵyn úıi bolmaǵan kezde olardy beıimdeý jáne yqpaldastyrý ortalyqtarynda, bilim berý mekemeleriniń jataqhanalaryna ýaqytsha tirkelý quqyǵy beriletin boldy», - deıdi depýtat Gúlnár Seıtmaǵanbetova.