Qazaqstannyń joǵary basqarýshylyq elıtasy ókilderiniń tizimi jasaldy - BAQ

ASTANA. 18 sáýir. QazAqparat - «Strategııa» áleýmettik jáne saıası zertteýler» qoǵamdyq qory Qazaqstannyń joǵary basqarýshylyq elıtasy ókilderiniń tizimin jasady.

Bul týraly «Ekspress K» gazeti «Respekt ı ývajýha» maqalasynda (18.04.2012 jylǵy № 68 (17426))  jazdy.

Tizimde birinshi bolyp Ulttyq qaýipsizdik komıtetiniń tóraǵasy Nurtaı Ábiqaev tur. Ekinshi orynda - Astana qalasynyń ákimi Imanǵalı Tasmaǵambetov. Qazaqstannyń Úkimet basshysy Kárim Másimov tizimde úshinshi bolyp tur. Tórtinshi orynda - Prezıdent Ákimshiliginiń jetekshisi Aslan Mýsın. Qazaqstannyń joǵary basqarýshylyq elıtasynyń beldi ókilderiniń bestigin Ulttyq banktiń tóraǵasy Grıgorıı Marchenko tuıyqtady.

Qurmetti tizimniń altynshy ornyna - «Samuryq-Qazyna» qorynyń tóraǵasy Ómirzaq Shókeev ornalasty. Jetinshi orynda - Májilis tóraǵasy Nurlan Nyǵmatýllın. Prezıdenttiń shtattan tys keńesshisi Bolat Ótemuratov reıtıngtiń segizinshi ornyn ıelendi. Toǵyzynshy orynda - Qaýipsizdik Keńesiniń hatshysy Marat Tájın. Prezıdenttiń shtattan tys keńesshisi Tımýr Qulybaev tizimniń onynshy ornynan kórindi. Qazaqstan Prezıdenti bul tizimge engizilgen joq.

Áleýmettanýshylar anyqtap bergendeı, Nursultan Nazarbaev saýalnamaǵa qatysýshy retinde áý basta qarastyrylmaǵan. «Bizdiń maqsatymyz basqarýshylyq elıtany baǵalaý boldy, al Prezıdent odan joǵary tur», - dep aıtty qordyń sarapshysy Serik Beısembaev.