Qazaqstannyń jeńil ónerkásip kásiporyndary birlestigi 13 kompanııamen tolyqty
«Birlestik quramynda 31 kompanııa bolǵan, jyl sońyna qaraı qatarymyzǵa taǵy 13 kásiporyn qosyldy. Buǵan deıin konsortsıým aýmaǵy 11 óńirge tarasa, jańa kompanııalarmen birge Qazaqstannyń barlyq óńiri qamtyldy», - dedi «Jasampaz» konsortsıýmy atqarý keńesiniń tóraǵasy Gúlmıra Ýahıtova Astanada ótken «Jeńil ónerkásip jetistikteri - 2017» dóńgelek ústelinde.
«Jasampaz» konsortsıýmy 2016 jyly qurylǵan jáne onyń negizgi baǵyty qazaqstandyq áskerılerdi arnaıy formamen qamtamasyz etý edi.
«Alǵashqy tapsyrys QR Qorǵanys mınıstrliginiń áskerı qyzmetshiler júıesine forma ázirleý boldy. Konsortsıým alǵashqylardyń biri bolyp qazaqstandyq matadan áskerı forma tigýdi, áskerı qural-jabdyqtar men kerek-jaraqtardy otandyq óndirýshilerdiń ázirleýin maqsat etip qoıdy», - dep atap ótti keńes tóraǵasy.
Onyń aıtýynsha, eki jylda Konsortsıým eleýli tabystarǵa qol jetkizgen.
«Qorǵanys mınıstrliginiń tapsyrysyn ekinshi jyl qatarynan oryndap kelemiz jáne aıtarlyqtaı tabystarǵa qol jetkizdik. 2016 jyldan beri respýblıkalyq bıýdjetke 3,6 mln teńge salyq tóledi. Birlestik arqyly kóptegen mekemeniń óndiretin taýar túri artty», - dedi Gúlmıra Ýahıtova.
Búginde Konsortsıým quramynda 44 mekeme bar. Atalǵan uıymdar «Qazaqstannyń úshinshi jańǵyrýy: jahandyq básekege qabilettilik» atty Memleket basshysynyń joldaýyndaǵy tapsyrmalardy oryndaý maqsatynda bir konsortsıýmǵa birikti jáne óz ınvestıtsııalary arqyly óndiristi damytyp, jergilikti taýar men qyzmet kórsetý úlesterin arttyrmaq.