Qazaqstannyń jastary Elbasynyń jastar saıasatyna qatysty usynystaryn qoldaıtyndyqtaryn bildirip, hattar joldaýda - Prezıdent poshtasynan

ASTANA. 11 mamyr. QazAqparat - Qazaqstan Respýblıkasynyń Prezıdenti,  Qazaqstan halqy Assambleıasynyń Tóraǵasy N.Á. Nazarbaevtyń bıylǵy 27 sáýirdegi Assambleıanyń XIX sessııasyndaǵy memlekettik jastar saıasatynyń 2020 jylǵa deıingi jańa tujyrymdamasynyń jobasyn ázirleý, jastar saıasaty jónindegi komıtetti, al óńirlerde tıisti basqarmalardy qurý týraly tapsyrmasyna qoldaý bildirgen hattar elimizdiń jastarynan kóptep kelip túsýde.

«Elbasy baıandamasynda «Memlekettik jastar saıasaty týraly» Zańǵa sáıkesinshe tolyqtyrýlar men ózgerister engizý, oblys pen qalada jastar saıasatyn júzege asyrý týraly arnaıy baǵdarlamalar qabyldaý jóninde tapsyrma berdi. «Nur Otan» HDP Ortalyq apparatyna «Jas Otan» jastar qanatynyń 2020 jylǵa deıingi is-qımyl strategııasyn ázirleý jáne bekitý týraly naqty mindet júktedi. Biz, «Jas Otan» jastar qanatynyń músheleri, osy strategııany ázirleýge atsalysqymyz keledi», - dep jazady «Jas Otan» jastar qanatynyń múshesi D.Ábýtálipov.

Al Qazaqstan Stýdentteriniń alıansy atynan kelgen hatta bylaı delingen: «Asa qadirli Nursultan Ábishuly, Sizdiń jastar saıasaty jónindegi komıtetti qurý týraly tapsyrmańyzdy Qazaqstan stýdentteri qoldaıdy. Bul qadam elimizdiń jastar saıasatynda óz nátıjesin beretinine senimimiz mol. Biz memleket alǵa qoıǵan maqsattarǵa jetý úshin úlesimizdi qosýǵa daıynbyz».

Prezıdenttiń óńirlerde jastar saıasaty jónindegi basqarmalardy qurý týraly tapsyrmasy jastardan qoldaý tabýda. Atap aıtqanda, Aqtóbe oblysy, Shalqar qalasynyń turǵyndary A.Berkimbaev, R.Dúıisov, M.Dánekerov, Shyǵys Qazaqstan oblysynyń turǵyny A.Qaıratova, Jambyl oblysynyń turǵyny E.Quralbaev, Semeı qalasynyń turǵyny M.Káribaev jastarǵa memlekettik deńgeıde kóńil bólip, naqty tapsyrmalar berip, qamqorlyq kórsetkeni úshin Elbasyǵa zor rızashylyq sezimderin bildiredi. Sondaı-aq, «Jas Otan» jastar qanaty Batys Qazaqstan oblystyq fılıalynan kelgen hatta: «Qurmetti Nursultan Ábishuly, jańashyl bastamańyzben jastardyń kóńilderine senim uıalattyńyz. Aqjaıyq ólkesiniń jalyndy jastary Sizdiń árbir isińizge sáttilik tileıdi»,- delingen.