Qazaqstannyń Japonııadaǵy elshiliginde Denıs Tenmen qoshtasýǵa kelgenderdiń sanynda shek joq

  ASTANA. QazAqparat - Tanymal mánerlep syrǵanaýshy Denıs Tendi eske alý rásimi Tokıodaǵy Qazaqstan elshiliginde de ótip jatyr. Sportshynyń japondyq tabynýshylary óz kýmırimen qoshtasý úshin uzyn-sonar kezekte tur, dep habarlaıdy QazAqparat tilshisi.

Elshilik jibergen vıdeojazbalarda gúl ustaǵan halyqtyń kóńil aıtý kitabyna jazba qaldyrý úshin kezekte turǵanyn kórýge bolady.

QR Syrtqy ister mınıstrliginiń baspasóz hatshysy Aıbek Smadııarovtyń habarlaýynsha, tolassyz adamdar legi Elshilikke áli de kelip jatyr jáne olar kóńil aıtýǵa arnalǵan segiz kitapty toltyryp úlgerdi.

Aıta keteıik, búgin Astana men Almaty qalalarynda dańqty sportshymen qoshtasý rásimi ótip jatyr.

Qazaqstan Prezıdenti Nursultan Nazarbaev Denıs Tenniń otbasyna kóńil aıtý jedelhatyn joldady.

Sharaǵa QR Mádenıet jáne sport mınıstri Arystanbek Muhamedıuly, QR Aqparat jáne kommýnıkatsııalar mınıstri Dáýren Abaev, Astana ákiminiń orynbasary Ermek Amanshaev jáne Ońtústik Koreıa men Japonııanyń Qazaqstandaǵy elshileri qatysýda.

Sondaı-aq áıgili sportshymen qoshtasý rásimine qazaqstandyq kəsipqoı boksshy Gennadıı Golovkın de keldi.

Aıta keteıik, qazaqstandyq sportshy Denıs Ten 19 shilde kúni pyshaqtan alǵan jaraqattan qaıtys boldy. Sportshy kóliginiń aınasyn urlamaq bolǵan eki adamnyń qylmysynyń ústinen túsken. Arada bastalǵan janjaldyń saldarynan urylar Denıs Tenge pyshaq suǵyp alǵan.