Qazaqstannyń jańa turǵyn úı baǵdarlamasy pysyqtaýǵa jiberildi

ASTANA. QazAqparat - QR Premer-Mınıstri Baqytjan Saǵyntaev jyl sońyna deıin «Nurly jer» turǵyn úı qurylysynyń biryńǵaı jańa baǵdarlamasynyń tujyrymdamasyn tyńǵylyqty qarastyrýdy tapsyrdy, dep habarlaıdy QazAqparat.

«Bul baǵytta tıisti maqsattardy Memleket basshysy aldymyzǵa qoıdy. «Nurly jer» baǵdarlamasy kerek, ıaǵnı adamdar ony kútip otyr. Osy rette jumysty jandandyrý qajet. Búgingi otyrysta aıtylǵan usynystardyń barlyǵyn taǵy da qarap shyǵý kerek. Qansha talqylaǵanymyzben, bizdiń baǵdarlamada tolyq túsindirilmegen nemese kórsetilmegen jáne tıisti deńgeıde jazylmaǵan tustary bolýy múmkin. Sondyqtan da Asqar Uzaqbaıuly (Úkimet basshysynyń birinshi orynbasary) jyl sońyna deıin barlyǵymen birge taǵy da qarastyryp, bekitýge usynyńyzdar»,-dedi B. Saǵyntaev Úkimet otyrysy barysynda.

Osy oraıda Premer-Mınıstr bul baǵdarlama 15 jylǵa eseptelgendikten, odan birmezette nátıje kútip kerek emes ekenin aıtty.

Ol ótken senbide Venada OPEK-ke múshe emes elder munaı óndirý kólemin tómendetý týraly ýaǵdalasqanyn, onyń ishinde Qazaqstan táýligine 20 myń barrelge deıingi kólemdi bekitkenin eske salyp ótti. Búginde baǵa 57 dollarǵa deıin jetip otyr.

«Aldaǵy jyl bıylǵa qaraǵanda tabysty bolady dep oılaımyn. Sondyqtan da biz ózimizdiń baǵdarlamada ustanymdy shyǵystardy kórsettik. Meniń oıymsha, ahýaldyń ózgerýin eskere otyryp, bizdiń baǵdarlamaǵa túzetýlerdi engizýge bolady, sondaı-aq búginde qaralyp otyrǵan qarqyn men ındıkatorlar emin-erkin qarastyryla alady. Onyń ishinde ekinshi deńgeıli bankter tarapynan da»,-dedi B. Saǵyntaev.