Qazaqstannyń jańa saıası, ekonomıkalyq, áleýmettik reformalary Grýzııada talqylandy
Bul týraly QazAqparat QR Syrtqy ister mınıstrliginiń baspasóz qyzmetine silteme jasap habarlaıdy.
«Trıbýna» saıası partııasynyń kóshbasshysy Davıd Chıchınadze Qazaqstandaǵy qasiretti qańtar oqıǵalaryn eskere otyryp, Prezıdent Q.Toqaevtyń bul Joldaýy birinshiden Qazaqstan halqy, ekinshiden álemdik qaýymdastyq úshin óz baǵytyn kórsetýdiń ýaqtyly sátine aınalǵanyn atap ótti.
Saıasatker, «Eýrazııa ınstıtýtynyń» basshysy Gýlbaat Rtshıladzeniń pikirinshe, Qazaqstan Prezıdenti Q.Toqaevtyń óz halqyna joldaýynda aıtqan bastamalary memleketti Ortalyq Azııadaǵy ǵana emes, búkil Azııadaǵy eń demokratııalyq memleketke aınaldyrady.
«Bul turǵyda Memleket basshysynyń Parlament pen azamattyq qoǵamnyń paıdasy úshin «artyq» ókilettikter men artyqshylyqtardan bas tartyp otyrǵanyn atap ótken jón. Konstıtýtsııalyq sottyń qurylýy, oǵan Bas prokýror men adam quqyǵy jónindegi ýákildiń júginýge múmkindik alatyndyǵy óte mańyzdy»,-dedi ol.
«Qazaqstanda kúshti prezıdenttik ınstıtýt qalady, alaıda avtorıtarlyq erekshelikter men ókilettiktersiz. Q.Toqaev atqarýshy, ásirese prezıdenttik bılik aldynda «qurdaı jorǵalaý» tájirıbesiniń joıylýyn qalaıdy. Árıne prezıdenttiń jaqyn týystaryna saıası memlekettik qyzmetshi bolýǵa jáne kvazımemlekettik sektorda basshylyq laýazymdardy ıelenýge zań júzinde tyıym salynýy tamyr-tanystyqqa jáne jalpy sybaılas jemqorlyqqa qarsy kúresti kúsheıtýdi bildiredi. Prezıdent sondaı-aq saıası partııalardy tirkeý rásimin jeńildetti. Bul qadam «ashý-yzanyń» basylýyna jáne tatýlasý men tynyshtyqqa yqpal etedi. Óıtkeni Qazaqstanda partııalyq ómir tym álsiz degen syn oppozıtsııadan da, Batystan da aıtylyp júrgen bolatyn. Endi bul olqylyq túzetildi», - dedi saıasattanýshy.
Grýzın sarapshysynyń aıtýynsha, Qazaqstan 2022 jylǵy qańtardaǵy daǵdarysty sátti eńserip, bolashaqqa nyq qadam basty.
«QR Prezıdentiniń Qazaqstannyń ózinde eldiń negizgi aktıvterin shoǵyrlandyrý týraly sheshimin óte mańyzdy dep sanaımyn. Árıne bul Ýkraına tóńireginde bolyp jatqan oqıǵalar men Reseıge qarsy sanktsııalar aıasynda memleket úshin jaqsy saqtandyrý. Jalpy álemdik ásirese, postkeńestik keńistiktegi turaqsyz konıýnktýraǵa qaramastan, Qazaqstandy órleý jyldary kútip tur dep boljaımyn», - dedi óz sózinde G.Rtshıladze.
«Geoecohub» ınternet basylymynyń redaktory, jýrnalıst Lıka Jorjolıanı odan ári demokratııalyq ózgeristerdi qurý táýelsiz jáne jaýapty buqaralyq aqparat quraldarynsyz múmkin emes ekenin, sondaı-aq olardyń demokratııalyq jáne ashyq memleket jańǵyrýynyń negizgi kepili bolyp tabylatyny týraly tezıstiń maqsatty jáne oryndy aıtylǵanyn atap ótti.
Іskerlik toptar ókilderi, «IDS Borjomı Grýzııa» kompanııasy dırektorynyń birinshi orynbasary, Qazaqstannyń Borjomıdegi Qurmetti konsýly Levan Bagdavadze, grýzın kásipkeri, Tbılısıdegi QR Qurmetti konsýly Georgıı Djahýtashvılı elimizdegi jańa saıası jáne ekonomıkalyq reformalar barlyq ózara tıimdi salalarda ekijaqty qatynastaryn jandandyratynyna senim bildirdi.