Qazaqstannyń jalpy halyqaralyq rezervteri 3,5 mlrd dollarǵa artty

ASTANA. QazAqparat – Qańtar aıynda Qazaqstannyń jalpy halyqaralyq rezervteri 3,5 mlrd dollarǵa ulǵaıyp, 94,3 mlrd dollardy qurady, dep habarlaıdy QazAqparat tilshisi.

Bul týraly QR Ulttyq banki tóraǵasynyń orynbasary Berik Sholpanqulov búgingi Úkimet otyrysynda aıtty.

«2023 jylǵy qańtar aıynyń qorytyndysy boıynsha, altyn-valıýta rezervteri valıýtadaǵy aktıvter men altyn baǵasynyń ósýine baılanysty 36,7 mlrd dollarǵa deıin 1,6 mlrd dollarǵa artty», - dedi Ulttyq bank ókili.

Spıkerdiń aıtýynsha, bıylǵy qańtarda Ulttyq qor aktıvteri negizgi álemdik ındeksterdiń ósýine baılanysty 57,6 mlrd dollarǵa deıin 3,4%-ǵa nemese 1,9 mlrd dollarǵa ulǵaıdy.

«Ulttyq qordan respýblıkalyq bıýdjetke 235 mlrd teńge transfert bólý úshin jyl basynan bastap 228 mln dollarǵa Ulttyq qordyń valıýtalyq aktıvteri satyldy. Túsim 197 mlrd teńgeni, onyń ishinde shetel valıýtasynda – 152 mln dollardy qurady», - dedi B. Sholpanqulov.

Aıta keteıik, qańtar aıynda teńgeniń dollarǵa qatysty baǵamy 460,52 teńgege deıin 0,5%-ǵa nyǵaıdy. Teńge baǵamy álemdik naryq pen geosaıası jaǵdaılarǵa baılanysty bolady.

Eldegi ınflıatsııanyń aılyq dınamıkasy tómendep keledi.

Sonymen birge, Qazaqstanda iskerlik belsendilik jaqsara bastady.