Qazaqstannyń úzdik JOO oqytýshylary anyqtaldy
«Joǵary oqý ornynyń úzdik oqytýshysy – 2021» baıqaýy jeńimpazdarynyń esimderi belgili boldy. Respýblıkalyq konkýrstyq komıssııa óz isiniń úzdikterin tańdady.
Qazaqstandyq 45 JOO-nyń 150 oqytýshysy jeńimpaz atandy. Olardyń árqaısysy 2000 AEK kóleminde syıaqy aldy, bul shamamen 6 mln teńge.
Úzdik pedagogterge marapattardy Ashat Aımaǵambetov tabystady.
«Men barlyq jeńimpazdardy quttyqtaımyn! Bul – úlken mártebe, mańyzdy ataq. Ustazdardyń qoǵamda altyn orny erekshe. «Adamnyń adamshyldyǵy - jaqsy ustazdan»,- dep uly Abaı aıtqandaı, ádiletti qoǵam, myqty memleket bolý úshin jáne Jańa Qazaqstandy qurýda ustazdardyń orny bólek. Memleket basshysy Qasym- Jomart Toqaevtyń tikeleı qoldaýynyń arqasynda Bilim jáne ǵylym salasynda úlken oń ózgerister bolyp jatyr. Sonyń ishinde ásirese, pedagogtardyń statýsyn kóterý boıynsha keshendi sharalar iske asyrylyp jatyr»,- dedi Ashat Aımaǵambetov.
Konkýrsqa elimizdiń 76 joǵary oqý ornynan barlyǵy 718 úmitker qatysty. Konkýrsta elektrondy oqý resýrstaryn, oqý materıaldaryn ázirleý jáne jarııalaý, otandyq jáne halyqaralyq jýrnaldardaǵy ǵylymı jarııalanymdar, ónertabysqa patentterdiń bolýy jáne t.b. sııaqty kórsetkishter baǵalandy, sondaı-aq úmitkerdiń oqytý sapasy, onyń bakalavrıatta, magıstratýrada jáne doktorantýrada kadrlar daıarlaý qyzmetindegi eńbegi baǵalandy.
Konkýrs jyl saıyn oqytýshylardyń bedelin arttyrý jáne olardy odan ári kásibı damytýǵa yntalandyrý maqsatynda ótkiziledi.
Aıta keteıik, konkýrs QR BǴM aqparattyq júıesiniń bazasynda ótti, onyń kómegimen qatysýshylarda barlyq kezeńniń ashyqtyǵyn baqylaýǵa múmkindik boldy. «Joǵary oqý ornynyń úzdik oqytýshysy – 2021» baıqaýyna qatysý úshin ótinimder men qujattar da elektrondyq formatta qabyldandy. Bul konkýrsty ótkizýdiń ashyqtyǵyn qamtamasyz etti.
Sondaı-aq komıssııa quramynda ÚEU, BAQ, stýdenttik jáne jastar uıymdarynyń, JOO qaýymdastyqtarynyń ókilderi jáne bilim berý salasyndaǵy sarapshylar boldy.