Qazaqstannyń úzdik pedagogtary Qostanaıda marapattaldy

QOSTANAI. QazAqparat- Búgin Qostanaıda muǵalimderdiń kásibı merekesi qarsańynda «Úzdik pedagog – 2021» respýblıkalyq baıqaýynyń qorytyndysy shyǵaryldy. Bul týraly QR Bilim jáne ǵylym mınıstri Ashat Aımaǵambetov Facebook-te jazdy, dep habarlaıdy QazAqparat.

«Bıyl onynshy ret ótip jatqan mereıtoılyq rásim Qazaqstan Táýelsizdiginiń 30 jyldyǵy qarsańynda uıymdastyrylyp, asa kórnekti aǵartýshy, pedagog Ybyraı Altynsarınniń 180 jyldyǵymen tuspa-tus keldi. Osyǵan baılanysty biz is-sharany uly aǵartýshynyń týǵan jerinde ótkizemiz dep sheshim qabyldadyq.

2020 jyldyń qańtarynda Memleket basshysy Qasym-Jomart Kemeluly Toqaev «Pedagog mártebesi týraly» Zańǵa qol qoıdy. Prezıdenttiń qoldaýynyń arqasynda jáne osy Zańnyń qabyldanýynyń nátıjesinde biz muǵalimderdiń jalaqysyn arttyryp, pedagogterdi ózine tán emes fýnktsııalardan bosatý boıynsha jumys júrgizdik.

Búgin elimizdiń túkpir-túkpirinen kelgen 64 muǵalim «Úzdik pedagog-2021» ataǵyna ıe boldy. Pedagogterdiń árqaısysy 1000 AEK kóleminde sertıfıkatpen jáne «Úzdik pedagog» tósbelgisimen marapattaldy. Sonymen qatar aqshalaı syıaqylar jergilikti atqarýshy organdar tarapynan da bekitildi. Bul kúni 10 pedagog «Eńbek ardageri» medalimen jáne «Y. Altynsarın», «Bilim berý isiniń qurmetti qyzmetkeri» tósbelgilerimen marapattaldy. Pedagogıka salasynyń eńbek ardagerlerine de qurmet kórsetildi.

Barlyq jeńimpazdy laıyqty marapattarymen quttyqtaımyn! Qajyrly eńbekterińiz ben mamandyqqa degen adaldyqtaryńyz úshin alǵys aıtamyn», - dep atap ótken Ashat Aımaǵambetov óz jazbasynda.