Qazaqstannyń úzdik ǵalymdaryna 6 mln teńgeden berildi

NUR-SULTAN. QazAqparat – Búgin elordada «Úzdik ǵylymı qyzmetker-2021» baıqaýynyń jeńimpazdaryn marapattaý rásimi ótti. Baıqaý jeńimpazdary 6 mıllıon teńge kóleminde aqshalaı syılyqaqy aldy, dep habarlaıdy QazAqparat tilshisi.

Atap aıtqanda, bul baıqaý alǵash ret ótkizilip otyr. Alty ǵylymı-zertteý ınstıtýty men birqatar joǵary oqý oryndarynyń 50 ǵalymy jeńimpaz atandy. Laýreattarǵa tósbelgiler men sertıfıkattardy QR Bilim jáne ǵylym mınıstri Ashat Aımaǵambetov tabystady.

«Bıyldan bastap otandyq ǵylym salasy damýynyń jańa kezeńi bastaldy. 3 myńǵa jýyq ǵalym jobasyna grant utqanyna nemese utpaǵanyna qaramastan, turaqty túrde jalaqy alatyn bolady. Turaqty qarjylandyrý zertteýlerdi kedergisiz júrgizýge múmkindik beredi. Sondaı-aq granttyq jáne maqsatty qarjylandyrý mehanızmin ózgerttik. Sońǵy jyldary ǵylym salasyn qarjylandyrý eki ese ósti. Prezıdenttiń tapsyrmasynyń aıasynda osy jańashyldyqtardy bekitken zań qabyldandy», - dedi mınıstr.

A. Aımaǵambetov Prezıdenttiń qoldaýynyń arqasynda ǵylym salasynda zańnamalar jetildirilip, qarjylandyrý eki ese óskenin aıtty. Jas ǵalymdarǵa jan-jaqty qoldaý kórsetilip, ulttyq ǵylymı-zertteý ınstıtýttarynyń materıaldy-tehnıkalyq bazasy jańartylyp jatyr. Sondaı-aq ǵalymdar jetekshi ǵylymı ortalyqtarǵa tájirıbeden ótýge jiberiledi, ǵylym salasyndaǵy bıýrokratııany toqtatý boıynsha jumys júrgizilip jatyr.

«Biz úshin barlyq protsedýralardyń ashyqtyǵyn qamtamasyz etý mańyzdy. Ǵylym salasynyń damýyna úles qosqan ǵalymdardy jeńisterimen shyn júrekten quttyqtaımyn. Qyzmetterińizge tabys tileımin!», – dedi Bilim jáne ǵylym mınıstri.

Aıta keteıik, baıqaýǵa ótinimder arnaıy qurylǵan aqparattyq platformada qabyldandy. Qujattardy tekserý komıssııasynyń quramyna sarapshylar, ǵalymdar, ǵylym akademııasynyń ókilderi, Jas ǵalymdar keńesi jáne Jas ǵalymdar alıansy músheleri, ǵylymı uıymdardyń músheleri endi.