Qazaqstannyń úzdik et eksporttaýshy memleket bolýyna barlyq múmkindikter bar - N. Nyǵmatýlın
Búgin «Qazaqstan Respýblıkasynda mal sharýashylyǵyn damytýdyń ózekti máseleleri men perspektıvalary» atty taqyrypta ótken Parlamenttik tyńdaýda sóz sóılegen Májilis spıkeri Nurlan Nyǵmatýlın osy máseleni erekshe atap ótti.
«Memleket basshysy atap ótkenindeı, qazirgi tańda dúnıejúzinde azyq-túlik ónimderine baılanysty álem úlken betburys aldynda tur. Osy kezeńde, biz búkil dúnıe júzinde sapaly azyq-túlik máselesin sheshe alatyn negizgi memleket ekenimizdi kórsetýimiz kerek. Bul úshin bizde barlyq múmkindikter bar. Sol múmkindikti tıimdi paıdalaný kerek dep esepteımiz,- dedi Nurlan Nyǵmatýlın.
Sonymen qatar, Májilis tóraǵasy parlamenttik tyńdaý barysynda ázirlengen naqty usynystar Elbasynyń aýyl sharýashylyǵyn jańǵyrtýǵa baılanysty aýqymdy tapsyrmalaryn oryndaý úshin Parlamenttiń, Úkimettiń jáne jergilikti atqarýshy organdardyń birlesken is-áreketiniń negizin qalaıtynyna senim bildirdi.