Qazaqstannyń úzdik debatshylary anyqtaldy

NUR-SULTAN. QazAqparat – 17-18 qazan kúnderi Shymkentte «Nur Otan» partııasynyń aýyspaly kýbogine arnalǵan XVIII respýblıkalyq pikirsaıys týrnıri ótti, dep habarlaıdy QazAqparat «Jas Otan» jastar qanatyna silteme jasap.

Jas Otan jáne Ulttyq pikirsaıys federatsııasy uıymdastyrǵan brıtandyq jáne amerıkalyq parlament formatyndaǵy týrnırge Qazaqstannyń ár túkpirinen 36 komanda qatysty. Týrnırdiń jalpy júlde qory 2 mln teńge bolǵan.

«Pikirsaıys týrnıriniń maqsaty – óz oıyn emin-erkin, azat ári naqty dáıekti túrde jetkizetin, talantty, bilimdi jastardy qoldaý. Bul osymen partııa tarapynan qoldaý tapqan kezekti 18-inshi týrnır. Bul – úlken tarıh. Urpaqtar sabaqtastyǵynyń aıqyn kórinisi - týrnırdiń qurmetti qonaqtary qatarynda týrnırge on jyl buryn qatysqan aǵa býyn ókilderiniń qatysýy», dep atap ótti Ulttyq pikirsaıys federatsııasynyń prezıdenti Buharbaı Bolat jeńimpazdardy marapattaý rásiminde.

Uıymdastyrýshylar «Shved modeli» tıimdi me? Onlaın-oqytý turaqty tájirıbege paıdalanǵan jón be? Praımerızdiń eń úzdik nátıjesi qandaı?» osy jáne basqa da kóptegen taqyryptardy týrnırdiń ózekti máseleleri dep tanydy.

«Jastar arasyndaǵy praımerızge, turmystyq zorlyq-zombylyqqa, sýıtsıdke jáne t.b. qatysty búgingi 12 ózekti taqyryp alyndy. Biz osy máselelerdi sheshýde jastardyń pikirin eskerý mańyzdy ekenin túsinýimiz kerek. Pikirsaıys - ymyraǵa kelýdiń jaqsy quraly. Praımerız kezinde kópshilik aldynda pikirsaıys munyń aıqyn dáleli boldy. Sondaı-aq, bul týrnır óz oıyn durys jetkize alatyn jastardy qoldaýǵa yqpal etedi», - deıdi «Jas Otan» jastar qanatynyń jetekshisi Elnur Beısenbaev.

Nátıjesinde «Úzdik tóreshi» nomınatsııasyn «Aqıqat» pikirsaıys klýbynyń ókili Ábdisattar Shiderbaı jeńip aldy. Petropavl qalasynyń «Imperator» fraktsııasy «Belsendi qatysýshy» nomınatsııasy men 100 myń teńge kólemindegi sertıfıkatqa ıe bolsa, úshinshi oryn men 200 myń teńgeni –Almaty qalasynyń «KN» komandasy jáne Kókshetaý qalasynyń «Vagabýnd» komandasy jeńip aldy.

Ekinshi oryn men 300 myń teńge sertıfıkatyn qazaq jáne orys lıgalarynda da Nur-Sultan qalasynyń pikirsaıysshylary aldy.

Qazaq lıgasynda birinshi oryndy Almaty qalasynyń «Praımerız» toby, orys lıgasynda «Pavlodar» toby ıelenip, 400 000 teńgelik sertıfıkattarǵa ıe boldy. Sondaı-aq, «Praımerız» komandasynyń pikirsaıysshysy Jarylqasyn Saqtaǵan «Úzdik spıker» atandy.