Qazaqstannyń ushý qaýipsizdigi standarttaryna sáıkestik deńgeıi 82 paıyzdy quraıdy
«Qazirgi ýaqytta Qazaqstannyń ushý qaýipsizdigi standarttaryna sáıkestik deńgeıi 82 paıyzdy quraıdy. Bul - Táýelsiz memleketter dostastyǵy elderi arasyndaǵy eń joǵary kórsetkishterdiń biri. Qazaqstan Danııa men Polsha sııaqty Eýropalyq odaq elderimen bir deńgeıde tur. Qaýipsizdik deńgeıiniń úzdiksiz ósýin qamtamasyz etý maqsatynda 2019 jyly eýropalyq model negizinde azamattyq avıatsııa júıesi túbegeıli reformalandy. Qazaqstannyń avıatsııalyq ákimshiligi quryldy. Oǵan zańnamalyq deńgeıde azamattyq avıatsııa salasyndaǵy baqylaý-qadaǵalaý fýnktsııalary berildi. Osy uıym qurylǵan sátten bastap 934 tekserý jáne sertıfıkattaý júrgizilip, ushýdy oryndaý úshin 1 500-ge jýyq ruqsat etý qujattary berildi», - dedi Marat Qarabaev.
Onyń atap ótýinshe, sertıfıkattyq talaptarǵa sáıkes kelmeıtin, sondaı-aq ushý qaýipsizdigine qater tóndirgen 7 áýe kompanııasynyń paıdalanýshy sertıfıkattarynyń kúshi joıyldy nemese keri qaıtaryldy. Sondaı-aq 7 áýejaıdyń ushý-qoný jolaǵyn paıdalaný ýaqytsha toqtatyldy.
«Búgingi kúni Azamattyq avıatsııanyń memlekettik tiziliminde 915 áýe kemesi bar. Óz qyzmetin 55 qazaqstandyq paıdalanýshy júzege asyrýda. Turaqty jolaýshylar tasymalyna 5 áýe kompanııasynyń 90 ushaǵy tartylǵan. Jańa model engizilgen sátten bastap oqıǵalar sanynyń tómendeýi baıqalady», - dedi mınıstr.