Qazaqstannyń ushý qaýipsizdigi standarttaryna sáıkestigi - 74 paıyz

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Prezıdent Q. Toqaevtyń áýe apattaryna yqpal etetin sebepter men jaǵdaılardy anyqtaýǵa, kinálilerdi jaýapqa tartýǵa qatysty tapsyrmasy qalaı oryndalyp jatqanyn baıandady, dep habarlaıdy QazAqparat.

Mınıstrliktiń habarlaýynsha, azamattyq avıatsııany basqarý tásilderine túbegeıli reforma júrgizildi.

Qabyldanǵan sharalar baqylaý men qadaǵalaýdyń tıimdiligin arttyrýǵa, Qazaqstannyń azamattyq avıatsııasynyń halyqaralyq arenadaǵy ımıdjin jaqsartýǵa múmkindik berdi.

«Qazaqstannyń avıatsııalyq ákimshiligi» AQ quryldy (100% memlekettiń qatysýymen), onyń negizgi fýnktsııasy – ushý qaýipsizdigi men avıatsııalyq qaýipsizdik salasyndaǵy tehnıkalyq baqylaý men qadaǵalaý. Mundaı tásil Qazaqstanda jáne TMD elderi arasynda alǵash ret engizildi. Basqarýdyń uqsas modeli eýropalyq azamattyq avıatsııa agenttiginiń (EASA) barlyq elderinde, damyǵan elderde (Sıngapýr, BAÁ, Frantsııa jáne t.b.) qoldanylady jáne IKAO moıyndaıdy. Azamattyq avıatsııa salasyn retteýdiń jańa modeli IKAO qujattaryna tolyq sáıkes keledi jáne bizdiń zańnamaǵa qaıshy kelmeıdi. Al azamattyq avıatsııa salasyndaǵy bılikti qalyptastyratyn memlekettik fýnktsııalar – memlekettik saıasatty aıqyndaý, NQA qabyldaý, tarıftik retteý, strategııany aıqyndaý jáne ýákiletti uıym basshylyǵyn taǵaıyndaý Azamattyq avıatsııa komıtetinde qalady» dep jazylǵan mınıstrlik habarlamasynda.

IKAO aýdıtiniń qorytyndysy boıynsha (2017) Qazaqstannyń ushý qaýipsizdigi jónindegi standarttarǵa sáıkestik deńgeıi 74% quraıdy.

Bul nátıje álemdik ortasha deńgeıden joǵary (63%) jáne is júzinde eýropalyq ortasha deńgeıge (76%) saı keledi.

Avıatsııalyq qaýipsizdik boıynsha Qazaqstannyń IKAO standarttaryna sáıkestik deńgeıi – 83%, bul ortasha álemdik deńgeıden 11%-ǵa joǵary (72%).

Avıatsııalyq ákimshilik 2020 jyly ushý qaýipsizdigi salasynda: 65 ınspektsııalyq tekserý, 9 avıakompanııany sertıfıkattaý, aeronavıgatsııa salasynda 17 aýdıt, 31 áýe aılaǵyn sertıfıkattaý, 19 áýe aılaǵyna ınspektsııalyq tekserý júrgizdi.

Onyń nátıjesi boıynsha ushý qaýipsizdigi talaptaryn saqtamaıtyn 8 avıakompanııanyń, onyń ishinde «Bek Eır», kúmándi júkti zańsyz tasymaldaýmen aınalysqan 3 avıakompanııanyń qyzmeti toqtatyldy.

«2009 jáne 2016 jyldary IKAO aýdıtiniń qorytyndysy boıynsha eń tómen kórsetkishterdiń biri – avıatsııalyq oqıǵalardy tekserý baǵyty bolǵan edi. Bul máselege birneshe ret nazar aýdaryldy jáne tergeýge jaýapty tıisti bólimsheni kúsheıtý qajettigi aıtyldy. Qazirgi ýaqytta aldaǵy IKAO aýdıtinen sátti ótý maqsatynda osy baǵyttaǵy jumys tıimdiligin arttyrý máselesi pysyqtalýda. Munda túrli nusqalar qarastyrylyp jatyr, onyń ishinde QR IIDM avıatsııalyq oqıǵalar men ıntsıdentterdi tekserý jónindegi basqarmasynyń fýnktsııalaryn ıntsıdentterdi tekserý jónindegi memleketaralyq nemese óńirlik organǵa (mysaly, Memleketaralyq avıatsııa komıtetine) berý de bar. Osy máseleni egjeı-tegjeıli zerttegennen keıin tıisti sheshim qabyldanady», - deıdi QR IIDM.