Qazaqstannyń Ulybrıtanııamen saýda kólemi 63,3 %-ǵa artty

LONDON. QazAqparat – Qazaqstan men Ulybrıtanııa arasyndaǵy saýda kólemi 63,3%-ǵa ulǵaıyp, 2,3 mlrd fýnt sterlıngti qurady (shamamen 2,6 mlrd dollarǵa jýyq – red.), dep habarlaıdy QazAqparat menshikti tilshisi Ulybrıtanııanyń halyqaralyq saýda mınıstrliginiń derekterine silteme jasap.

«Ulybrıtanııa men Qazaqstan arasyndaǵy taýarlar men qyzmetter saýdasynyń jalpy kólemi 2021 jylǵy shildeden 2022 jylǵy maýsymǵa deıin 2,3 mlrd fýnt sterlıngti qurady. Bul 2020 jylǵy shildeden 2021 jylǵy maýsymǵa deıingi kezeńmen salystyrǵanda 63,3%-ǵa nemese 896 mln fýnt sterlıngke kóp», - dep habarlady brıtandyq halyqaralyq saýda mınıstrligi.

Ekijaqty saýdanyń negizgi ósimi Qazaqstannan Ulybrıtanııaǵa shyǵarylǵan eksportqa tıesili. Bir jyl ishinde bizdiń elden brıtandyq ıýrısdıktsııalarǵa 1,5 mıllıard fýnt sterlıng somasyna taýarlar jóneltilip, qyzmetter kórsetildi, bul bir jyl burynǵydan 135,9%-ǵa artyq. Osy ýaqyt ishinde Ulybrıtanııadan Qazaqstanǵa ákelingen ımport kólemi 781 mln fýnt sterlıngti qurady, bul bir jyl burynǵy kórsetkishterden 1,8%-ǵa ǵana kóp.

Bıyl Qazaqstan Ulybrıtanııanyń saýda seriktesteriniń sany boıynsha 62-shi orynda. Ulybrıtanııadan Qazaqstanǵa negizinen ushaqtar, ónerkásip jabdyqtary, ǵylymı aspaptar, dárilik jáne farmatsevtıkalyq preparattar jetkiziledi. Brıtandyqtar qazaqstandyq seriktesterinen baǵaly jáne tústi metaldardy, shıki munaıdy, hımıkattar men ónerkásiptik jabdyqtardy satyp alady.

Tımýr Dúısekeev