Qazaqstannyń ulttyq kompanııasy halyqaralyq bedeldi basylymnyń mártebeli nagradasyn aldy

ASTANA. QazAqparat - Halyqaralyq bedeldi «EMEA Finance» jýrnaly ınvestorlardyń keń aýqymy arasynda «QazAgroQarjy» AQ teńgelik oblıgatsııalarynyń debıýttik shyǵarylymyn «Eýropada, Taıaý jáne Orta Shyǵysta ári Afrıkada ulttyq valıýtadaǵy oblıgatsııalardyń eń úzdik shyǵarylymy»  (The Best Local Currency Bond in EMEA) nomınatsııasynyń jeńimpazy dep tanydy, dep habarlaıdy QazAqparat.

Atalǵan kompanııa baspasóz qyzmetiniń aqparatyna sáıkes, bul nagrada kompanııaǵa halyqaralyq kapıal naryqtaryndaǵy - EMEA Finance Achievement Awards 2016 jyl saıynǵy eń úzdik mámilelerdi irikteý aıasynda berildi.

«Senim artqany úshin ınvestorlarǵa, sondaı-aq nátıjesi osy nagrada bolyp tabylatyn mámileni uıymdastyrýda tártipke salynǵan jumysy úshin anderraıterlerdiń konsortsıýmyna kompanııanyń atynan alǵysymyzdy bildiremiz», - dedi «QazAgroQarjy» AQ basqarma tóraǵasynyń birinshi orynbasary Aınur Seıtqasymova.

Esterińizge sala keteıik, ınvestorlardyń keń aýqymy arasynda jalpy somasy 8 mlrd. teńgege «QazAgroQarjy» AQ 5-jyldyq teńgelik oblıgatsııalaryn debıýtti naryqtyq ornalastyrý 2016 jylǵy 14 qarashada bolyp ótti. Emıssııalyq konsortsıýmnyń basqarýshysy jáne mámile jónindegi qarjy keńesshisi retinde «Halyk Finance» AQ, birlesken anderraıterleri  Eýrazııalyq Damý Banki men «Tsesna Kapıtal» AQ boldy.

Atalǵan mámile boıynsha suranys usynystan edáýir asyp ketkenin jáne artynda oń tájirıbesi bola turyp, «QazAgroQarjy» AQ bul jumysty odan ári jalǵastyrýdy josparlap otyrǵanyn atap ótý mańyzdy.