Qazaqstannyń Ulttyq brendin anyqtaý jónindegi konkýrs bastalady
«Qymbatty dostar! Qazirgi álemde eldik brendıng memlekettiń ınvestıtsııalyq jáne týrıstik tartymdylyǵynyń deńgeıin aıqyndap, óndiretin taýarlarynyń tanymal bolýyna, halyqaralyq arenadaǵy bedeline, tipti jahandyq eńbek bólinisinen oryn alýyna da yqpal etetini belgili. Árıne, sapaly eldik brendıngke qashanda sol memlekettiń shynaıy jetistikteri negiz bolmaq. Bul degenimiz halyqtyń bilim deńgeıi, ınfraqurylymdy damytý kórsetkishi, sybaılas jemqorlyqpen kúrestegi tıimdiligi, sporttaǵy jáne basqa da jetistikteri.
Sonymen qatar, eldiń ımıdjin saýatty túrde ilgeriletý úshin onymen baılanysty obrazdar, ıdeıalar men assotsıatsııalar kreatıvti, qaıtalanbas ári jadyńda jattalyp qalatyn sımvolıkamen bite qaınasýy kerek. Osyndaı irgeli isti bizdiń elimiz de qolǵa alýda. Atap aıtqanda, búgin Qazaqstannyń Ulttyq brendin anyqtaý jónindegi konkýrs bastalady», - dep jazdy mınıstr.
D.Abaevtyń habarlaýynsha, baıqaýǵa usynylǵan jumystardy jınaqtaý mınıstrlik saıtynda (https://mic.gov.kz/kk/competition) bir aı boıy júrgiziledi. Ótinimmen birge logotıp, uran, erkin formada jazylǵan jáne jumystyń máni men mazmunyn ashyp kórsetetin qysqasha tujyrymdama joldanýy tıis.
Baıqaý eki kezeńnen turady. Birinshi ınternette daýys berý. Ótinimderdi jınaýdyń qorytyndysy boıynsha 15 kún ishinde jurtshylyq olardyń arasynan úzdik degenin tańdaıdy.Ekinshi ınternette daýys berý nátıjesinde iriktelgen úzdik jumystardy (eń kóbi 10 jumys) Sarapshylyq keńes aldynda tanystyrý. Keńeske tanymal qoǵamdyq jáne saıası qaıratkerler, mádenıet pen óner salasynyń ókilderi, sonymen birge otandyq jáne halyqaralyq sarapshylar enedi.
«Baıqaýǵa mamandyǵyna, zańdy mártebesine, jasy men azamattyǵyna qaramastan, kez kelgen adam qatysa alady. Jeńimpaz 5 mıllıon teńge kólemindegi syıaqyǵa ıe bolmaq. Jalpy, Baıqaý týraly tolyq aqparatty onyń erejesimen tanysý barysynda ala alasyzdar», - dep atap ótken mınıstr.