Qazaqstannyń Ulttyq brendin anyqtaý jónindegi baıqaý jeńimpazy 5 mıllıon teńge alady
Esterińizge sala keteıik, taıaýda Qazaqstannyń Ulttyq brendin anyqtaý jónindegi konkýrs bastalatyndyǵyn QR Aqparat jáne kommýnıkatsııalar mınıstri Dáýren Abaev málimdegen bolatyn.
«Eldiń ımıdjin saýatty túrde ilgeriletý úshin onymen baılanysty obrazdar, ıdeıalar men assotsıatsııalar kreatıvti, qaıtalanbas ári jadyńda jattalyp qalatyn sımvolıkamen bite qaınasýy kerek. Osyndaı irgeli isti bizdiń elimiz de qolǵa alýda. Atap aıtqanda, búgin Qazaqstannyń Ulttyq brendin anyqtaý jónindegi konkýrs bastalady», - dep atap ótti mınıstr.
Baıqaýǵa jeke jáne zańdy tulǵalar azamattyǵy boıynsha shekteýsiz qatysa alady. Qazaqstan Respýblıkasynyń Ulttyq brendin anyqtaý jónindegi Baıqaýǵa qatysýshylar mynalardy usynýy tıis:
1. Logotıp - álemdik arenada Qazaqstannyń tanymaldyǵyn arttyrý úshin qoldanatyn grafıkalyq belgi (emblema/sımvol). Onda stıldengen áripter jáne/nemese sóz túrinde sáıkestendirgen brendtiń ataýy kórinis tabýy qajet. Logotıp jpeg, png, giff formattarda, 1000x1000 px kóleminde usynylýy tıis.
2. Uran - týrıstik jáne ınvestıtsııalyq tartymdylyqty arttyra otyryp, qazaqstandyq brendke degen senimdiligin kúsheıtý arqyly maqsatty aýdıtorııanyń nazaryn tartýǵa arnalǵan jarnamalyq kommýnıkatsııanyń barlyq túrinde qoldanylatyn habarlamany sıpattaıtyn ımıdjdik devız bolyp tabylady. Uran ońaı oqylatyn, jınaqy, qyzyǵýshylyq týǵyzatyn bolýy tıis jáne memlekettik, orys jáne aǵylshyn tilderinde usynylýy kerek.
3. Qazaqstan Respýblıkasy Ulttyq brendiniń tujyrymdamasyn erkin formatta memlekettik jáne orys tilderinde daıyndap, usynýǵa bolady.
Tujyrymdamada brend-býk formatynda brendti túrli ımıdjdik ónimderge (qalamsap, salpynshaq, belgishe, jeıde, beısbolka jáne taǵy basqalar) qondyrýdyń úlgileri, sondaı-aq bılbord maketteri, elektrondyq jáne baspa BAQ-tyń jarnamalyq modýlderi, veb-saıt bannerleri, broshıýralar, paraqshalar jáne basqa da ónimder usynýǵa bolady.
Sondaı-aq, tujyrymdamada jumystyń ortaq ıdeıasy sıpattalyp, usynylǵan uran men logotıpterdiń negizdemesi boıynsha túsinikteme berilýi tıis.
Al jumysty tańdaýdaǵy parametrlerge toqtalatyn bolsaq, ıdeıanyń jańashyldyǵy men qaıtalanbastyǵy, jeńil qabyldanýy men ońaı este qalýy, eldiń erekshelikteriniń kórinis tabýy (mádenıet, ádet-ǵuryp, ındýstrııa, týrızm, qundylyqtar), kórkem obrazdyń jınaqylyǵy, oryndalǵan jumystyń estetıkasy men sapasy, standarttan tys tehnıka men kórkem materıaldardy qoldaný, stıldiń ómirsheńdigi, tartymdylyǵy, sondaı-aq eldiń ınnovatsııany damytý jáne engizýge degen umtylysyn beıneleý, otandyq, sonymen birge halyqaralyq aýdıtorııaǵa baǵdarlanýy eskerilýi tıis.
Baıqaý eki kezeńnen turady. Birinshi ınternette daýys berý. Ótinimderdi jınaýdyń qorytyndysy boıynsha 15 kún ishinde jurtshylyq olardyń arasynan úzdik degenin tańdaıdy.Ekinshi ınternette daýys berý nátıjesinde iriktelgen úzdik jumystardy (eń kóbi 10 jumys) Sarapshylyq keńes aldynda tanystyrý. Keńeske tanymal qoǵamdyq jáne saıası qaıratkerler, mádenıet pen óner salasynyń ókilderi, sonymen birge otandyq jáne halyqaralyq sarapshylar enedi.
Baıqaýǵa mamandyǵyna, zańdy mártebesine, jasy men azamattyǵyna qaramastan, kez kelgen adam qatysa alady. Jeńimpaz 5 mıllıon teńge kólemindegi syıaqyǵa ıe bolmaq.
Baıqaýǵa usynylǵan jumystardy jınaqtaý mınıstrlik saıtynda (https://mic.gov.kz/kk/competition) bir aı boıy júrgiziledi. Ótinimmen birge logotıp, uran, erkin formada jazylǵan jáne jumystyń máni men mazmunyn ashyp kórsetetin qysqasha tujyrymdama joldanýy tıis.