Qazaqstannyń ulttyq biregeılik modeli Elbasy esimimen baılanysty

ASTANA. QazAqparat - QR Memlekettik hatshysy Gúlshara Ábdiqalyqova «Biregeılik pen birlik: Qazaqstan joly jáne N.Á.Nazarbaevtyń úlgisi» atty halyqaralyq ǵylymı-tájirıbelik konferentsııa qatysýshylaryna quttyqtaý joldady. Atalǵan shara QR Tuńǵysh Prezıdenti kúni men elordanyń Astanaǵa kóshirilýiniń 20 jyldyǵyna arnalyp uıymdastyryldy, dep habarlaıdy QazAqparat.

«Qazirgi zamanǵy ózekti taqyrypqa arnalǵan mańyzdy forýmnyń bastalýymen barshańyzdy quttyqtaımyn. Ulttyq biregeılikti saqtaý jáne nyǵaıtý  kópqyrly ári jaýapty mindet. Ony laıyqty deńgeıde iske asyrý búgingi jahandyq ózgerister zamanyndaǵy ornyqty damýdyń kepili bolyp tabylady. Táýelsizdik jyldarynda Qazaqstan ulttyq biregeılik pen qoǵam birligin arttyrýdyń ózindik modelin qalyptastyrdy. Bul osynaý ólshemge  árdaıym erekshe kóńil bóletin Nursultan Ábishuly Nazarbaev esimimen tikeleı baılanysty úlgi. El Prezıdentiniń bastamasymen qoǵamdyq sanany jańǵyrtýǵa arnalǵan «Rýhanı jańǵyrý» baǵdarlamasynyń qolǵa alynýy atalǵan modelge jańa serpin berdi. Jańǵyrý qundylyqtary qoǵamdaǵy birlik pen kelisimdi  qamtamasyz etýdiń mańyzdy faktoryna aınalýda. Búgingi konferentsııada biregeıliktiń túrli aspektileri rýhanı jańarýdyń negizgi baǵyttary aıasynda jan-jaqty  qarastyrylady dep senemin. Qoǵamdyq kelisim men jalpyulttyq birliktiń qazaqstandyq  modeliniń áleýetin odan ári damyta túsýge bul is oń yqpal etedi dep úmittenemin», - delingen Memlekettik hatshy quttyqtaýynda.

Aıta keteıik, konferentsııa aıasynda QR Tuńǵysh Prezıdenti - Elbasy kitaphanasynda «Tarıhı tańdaý. Memlekettilik negizi» atty kórmeniń ashylýy ótti.  Kórme aıtýly  jyldarǵa sıpattama beredi  jáne ol eki bólimnen turady. Tutastaı alǵanda kórmede usynylǵan materıaldar 1991 jyly 1 jeltoqsanda Qazaqstan Kóshbasshysy men onyń halqy tarıhı tańdaý jasaǵan memlekettiligimizdiń qalyptasýyndaǵy mańyzdy jetistikterdi kórýge bolady.