Qazaqstannyń Terrorızmge qarsy kodeksine 70-ten astam memleket qol qoıdy - Elbasy

ASTANA. QazAqparat - Qazaqstannyń Terrorızmnen azat álemge qol jetkizý tártibi kodeksine 70-ten astam memleket qol qoıdy. Bul týraly búgin Aqordada Qazaqstanda tirkelgen dıplomatııalyq mıssııalar men halyqaralyq uıymdardyń basshylarymen kezdeý barysynda Elbasy Nursultan Nazarbaev aıtty, dep habarlaıdy QazAqparat tilshisi.

«Jahandyq bastamalar arqyly  memleketimizdiń bedelin, halyqaralyq arenadaǵy Qazaqstannyń ornyn naqtylaý. Buǵan Qazaqstannyń BUU Qaýipsizdik keńesiniń turaqty emes  múshesi retindegi qyzmetiniń qorytyndylary dálel. Jyl basynda  Nıý-Iorkte elimizdiń Qaýipsizdik keńesine tóraǵalyǵy aıasynda jappaı qyryp-joıý qarýyn taratpaý, senim sharalary taqyrybynda arnaıy otyrys ótkizildi. Atalǵan is-shara barysynda BUU QK tóraǵasynyń biregeı málimdemesi qabyldandy. Bul Qaýipsizdik keńesiniń jappaı quryp-joıý qarýyn taratpaý aıasyndaǵy senim sharalaryn nyǵaıtýǵa baǵyttalǵan tuńǵysh saıası qujat bolyp tabylady», - dedi Nursultan Nazarbaev.

Elbasy qyrkúıek aıynda BUU Bas Assambleıasynyń 73 sessııasy barysynda  Qazaqstan usynǵan Terrorızmnen azat álemge qol jetkizý tártibi kodeksine qazirgi kúni 70-ten astam memleket qol qoıǵanyn aıtty.  Atalǵan kodeks  BUU-nyń terrorızmge qarsy júıesin nyǵaıtýdaǵy mańyzdy qadam retinde tanylǵanyn atap ótti. 
 

«Qazaqstan Qaýipsizdik keńesiniń birqatar qurylymdaryna tóraǵalyq etken kezde Ortalyq Azııa jáne Aýǵanstan máselelerine basa nazar aýdardy. Osylaısha, bizdiń elimiz «Álem - HHІ ǵasyr» manıfesinde jarııa etken qazirgi zamannyń ózekti problemalaryn sheshý joldaryna qatysty ustanymyn naqty, dáıekti túrde ilgeriletýin jalǵastyrýda»,- dedi QR Prezıdenti.