Qazaqstannyń tehnologııalary barlyq qurlyqta qoldanylady - ǵalym
«Búginde jýrnalıster de, sheneýnikter de, halyq ta Qazaqstannyń ǵylymyn onsha maqtamaıdy. «Ǵalymdar túk istemeıdi. Halyqtyń aqshasyn jaıdan-jaı jep jatyr» degen áńgimeni jıi estımiz. Bir jaǵynan, ol durys ta shyǵar. Biraq bundaı áńgimeler aqparattyń azdyǵynan týyndaıdy dep oılaımyz. Mysaly, bizdiń tehnologııalarymyz Antarktıda men Avstralııadan bastap barlyq qurlyqta qoldanylady. Ol memleketterdiń ishinde Kanada, Brazılııa, Italııa, Bolıvııa, Qytaı, Reseı, Ýkraına, Qyrǵyzstan men Ózbekstan da bar», - dedi Á.Jármenov elordada ótken baspasóz máslıhatynda.
Professordyń aıtýynsha, otandyq tehnologııalardyń negizinde álem boıynsha jańadan zaýyttar men fabrıkalar salyndy. Sońǵy 20 jyldyń ishinde atalǵan óndiris oryndaryna 3,5 mıllıard dollardan astam qarjy quıyldy. «Ol zaýyttar jylyna 4 mıllıard dollardyń ónimderin shyǵaryp otyrady. Endi, biz keıbir baǵyttar boıynsha aldyńǵy qatarda júrmiz. Al keıbir baǵyttar boıynsha qalyńqyrap jatyrmyz. Ol - ómirdiń zańdylyǵy. Sebebi onyń bárin birden alyp ketý múmkin emes. Mysaly, biz qorǵasyn tehnologııasyn jaqsy damyta bildik. Onyń kómegimen dúnıejúzinde qorǵasynnyń árbir 10-tonnasy óndiriledi. Kıvtset-tehnologııasy deımiz. Sosyn altyn óndirý tehnologııasy boıynsha biz kóp elderden alda turmyz. Qazaqstandaǵy altynnyń árbir 3-tonnasy otandyq tehnologııa negizinde óndiriledi. Budan bólek, Reseı, Qyrǵyzstan, Ózbekstan men Qytaıda altyn qazaqstandyq tehnologııamen shyǵarady», - dep atap kórsetti Á.Jármenov.
Ortalyq basshysynyń sózine qaraǵanda, Qazaqstan ferroqorytpa kesheni boıynsha oq boıy ozyq keledi. Sonyń negizinde shetelde birneshe zaýyt salý josparlanyp otyr. Qaraǵandy qalasynda da osy saladaǵy óndiris ashylmaq.