Qazaqstannyń tájirıbesi tsıfrlandyrý deńgeıi tómen elderge taratylýy múmkin

ASTANA. QazAqparat - Qazaqstannyń Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın AQSh-ta BUU Bas hatshysynyń orynbasary, Bas hatshynyń tehnologııa máseleleri jónindegi ókili Amandıp Sıngh Gıllmen kezdesti, dep habarlaıdy QazAqparat.

Mınıstr bul jaıynda Instagram paraqshasynda jazdy.

«Kezdesý barysynda Qazaqstandaǵy tsıfrlyq salanyń máselelerine toqtaldyq, Gıll myrzaǵa tsıfrlandyrý salasynda qandaı jobalardy júzege asyryp jatqanymyz, onyń ishinde TechOrda baǵdarlamasy jáne IT maman daıarlaý, GovTech platformasyn ázirleý, sondaı-aq birinshi kezekte qyzmet kórsetý salasynda «adamdarǵa baǵdarlaný» qaǵıdasyna nazar aýdara otyryp, Kórinbeıtin úkimet /Invisible Government júıesin engizip jatqanymyzdy aıttym»,- deıdi Baǵdat Mýsın.

Onyń aıtýynsha, Qazaqstan tsıfrlyq yntymaqtastyqtyń jol kartasynda baıandalǵan barlyq baǵyttar boıynsha jumys istep jatyr.

Qazaqstandyq delegatsııa negizgi basymdyqtyń biri retinde jasandy ıntellektiń damýyn talqylap, Bas hatshynyń orynbasaryna Smart Data Ukimet júıesin tanystyrǵan.

«Sondaı-aq, óz fýnktsııalaryn jasandy ıntellekt jáne blokcheın sııaqty ozyq tsıfrlyq tehnologııalardy paıdalanýǵa baılanysty tsıfrlyq sheshimderdi usynýǵa ǵana emes, sonymen qatar osyndaı ozyq sheshimderdi basqa da elderge múmkindiginshe usynýdy kózdeıtin Tsıfrlyq sheshimder ortalyǵyn qurý ıdeıasy týraly aıttym. Kezdesý sońynda Gıll myrzany Digital Bridge-2023 forýmyna qatysýǵa shaqyrdym», - dep jazady mınıstr.

Baǵdat Mýsın BUU-daǵy is-sharalar alańynda Halyqaralyq elektr baılanysy odaǵynyń basshysy Dorın Bogdan-Martınmen de kezdeskenin aıtady.

Onyń barysynda tsıfrlandyrý deńgeıi damýdy qajet etetin basqa elderge Qazaqstannyń tájirıbesin bólisý múmkindikteri talqylanǵan.

«Sonymen qatar, elimizdiń basqa elderge opensorz formatynda qazaqstandyq ónimderdi ilgeriletýdi kózdeıtin Govstack bastamasyna qosylýǵa daıyn ekenimizdi jetkizdik. Jerdi qashyqtan zondtaý máselesin pysyqtaý boıynsha elimizdiń tájirıbesi talqylandy jáne ony basqa elderge de taratý kerek degen oıǵa keldik. Elimizdiń aýmaǵyn baılanyspen qamtýdy qamtamasyz etý jónindegi mindetterdi ózektendirý máselesi jeke talqylandy»,-dep túıindedi mınıstr.