Qazaqstannyń taý-ken kompanııalary daǵdarysty eńsere alady – QR IIDM

NUR-SULTAN. QazAqparat – QR Indýstrııa jáne ınfraqurylymdyq damý mınıstrligi Indýstrııalyq damý jáne ónerkásiptik qaýipsizdik komıtetiniń tóraǵasy Marat Qarabaev taý-ken óndirý kompanııalary pandemııa kezinde qalaı jumys istep otyrǵanyn aıtty, dep habarlaıdy QazAqparat tilshisi.

«Bıyl búkil álem indetke tap boldy, sala koronavırýs pandemııasy saldaryn sezindi. Kásiporyndar óz jobalaryn belgisiz ýaqytqa keıinge qaldyrdy. Metaldar baǵasynyń jappaı tómendeýi oryn alyp otyr. Qazaqstandaǵy sala ókilderiniń kezdesýine arnalǵan dástúrli alańdar – «Astana Mining & Metallurgy Congress» kórmesi álemdik karantın saldarynan 2021 jylǵa qaldyryldy. Degenmen búgin sizdermen iri jáne shaǵyn kásiporyndardyń sala aldynda turǵan qazirgi máselelerin eskere otyryp, júıeli suhbat quryp, salanyń ózekti máselelerin ashyq talqylaý úshin, qazaqstandyq jáne sheteldik ónerkásip ókilderi arasynda iskerlik baılanysty nyǵaıtý úshin onlaın kezdesý ótkizýdi uıǵardyq», - dedi M. Qarabaev «Qazaqstannyń taý-ken salasynyń jańa jaǵdaıy» atty onlaın konferentsııada.

Spıker pandemııa saldarynan álem boıynsha jahandyq ekonomıkanyń quldyraǵanyn atap ótti. Biraq 2020 jyldyń 9 aıyn taldaı kele, Qazaqstannyń 40 jetekshi taý-ken óndirýshi kompanııasynyń osy daǵdarystardy jeńýge jaqsy múmkindigi bary anyqtaldy.

«Buǵan pandemııa kezeńinde memlekettiń ýaqytyly qoldaýy yqpal etti. Ótken 2019 jylǵy tabysty qyzmet pen salaǵa salynǵan aýqymdy kapıtaldyq salymdar arqyly qazaqstandyq taý-ken-metall sektory jańa jaǵdaıǵa beıimdele aldy jáne jańǵyrtý jolyna qaraı turaqty jyljyp keledi. Jańa tehnologııalyq ınnovatsııalar men tsıfrlyq sheshimderdi qoldanýdyń, saýatty menedjmenttiń arqasynda, jalpy ónim shyǵarý kólemin kúrt tómendetpeı, jumys oryndaryn saqtap qala aldyq jáne ınvestıtsııalyq jobalardy tolyq kólemde iske asyra aldyq. Taý-ken salasynda esh quldyraý baıqalmaıdy jáne kórsetkishter 2019 jylǵy deńgeıde qalyp otyr. Meniń oıymsha, pandemııa kezeńi úshin bul óte jaqsy kórsetkish. Taý-ken kesheni kompanııalaryndaǵy tsıfrlandyrý men qoljetimdi tehnologııalar Prezıdent Joldaýynda aıtylǵan ulttyq básekege qabilettilikke qol jetkizýdiń negizgi quraly. Ónerkásip pen IT-sala arasyndaǵy ózara tıimdi yntymaqtastyq pandemııadan keıingi kezeńde qozǵaýshy kúshke aınalýy múmkin zamanaýı tsıfrlyq tehnologııalyq platformalardy qalyptastyrýǵa múmkindik beredi», - dedi M. Qarabaev.