Qazaqstannyń syrtqy saýda aınalymy ulǵaıdy

NUR-SULTAN. QazAqparat - Bıyl alǵashqy eki aıdyń ishinde Qazaqstannyń syrtqy saýda aınalymy 14 mlrd 340,2 mln AQSh dollaryn qurady. Bul ótken jyldyń atalǵan kezeńimen salystyrǵanda 7,5 protsentke artyq, dep habarlaıdy QazAqparat tilshisi QR Ulttyq ekonomıka mınıstrliginiń statıstıka komıtetine silteme jasap.

Qańtar-aqpan aılarynda eksporttyń kólemi 9 mlrd 885,1 mln dollar bolǵan. Al ımport 4 mlrd 455,1 mln dollardy qurady. Al negizgi kapıtalǵa salynǵan ınvestıtsııalardyń mólsheri 2 126,3 mlrd teńgege jetti. Bul - qańtar-naýryz aılarynyń nátıjesi. Ótken jyldyń atalǵan kezeńimen salystyrǵanda atalǵan kórsetkish 7 protsentke artyp otyr.

«Negizi kapıtalǵa salynǵan ınvestıtsııalardyń basym bóligi taý-ken ónerkásibine (56,3%), jyljymaıtyn múlik operatsııalaryna (12,5%), kólik pen qoıma kásibine (7,1%) tıesili. Al iri kásiporyndardyń salǵan ınvestıtsııalary 1 392,1 mlrd teńgeni qurady», - delingen komıtettiń resmı habarlamasynda.