Qazaqstannyń syrtqy saýda aınalymy 7,4 paıyzǵa tómendedi

NUR-SULTAN. QazAqparat – Qazaqstannyń syrtqy saýda aınalymy 7,4 paıyzǵa tómendedi. Bul týraly Saýda jáne ıntegratsııa mınıstri Baqyt Sultanov aıtty, dep habarlaıdy QazAqparat tilshisi.

«Álemdegi saýdanyń jalpylaı tejelýi turǵysynda Qazaqstannyń syrtqy saýda aınalymy birinshi jartyjyldyq qorytyndysy boıynsha 7,4 paıyzǵa tómendedi», - dedi mınıstr onlaın rejımde halyq aldynda esep berýi barysynda.

Onyń sózine qaraǵanda, Eýrazııalyq ekonomıkalyq odaq aıasynda syrtqy saýda aınalymy 10 paıyzǵa tómendedi.

«Basqa da óńirlik birlestikterde saýda qatysýshy elderdiń ekonomıkalyq belsendiginiń basty yntalandyrýshysy bolyp otyr. Sondyqtan saýdany barynsha aımaqtandyrý Eýrazııalyq ekonomıkalyq odaqtyń negizgi maqsaty bolýy kerek», - dedi B. Sultanov.

Budan buryn habarlanǵandaı, bıylǵy jarty jylda ishki taýar aınalym 6,9 paıyzǵa tómendedi.