Qazaqstannyń syrtqy saýda aınalymy 1,7 paıyzǵa ósti

NUR-SULTAN. QazAqparat - Bıylǵy 8 aıda Qazaqstannyń syrtqy saýda aınalymy 1,7 paıyzǵa ósti. Bul jaıynda QR UEM Statıstıka komıtetinen málim etti, dep habarlaıdy QazAqparat tilshisi.

«2019 jylǵy qańtar-shildede Qazaqstannyń syrtqy saýda aınalymy 53829 mln AQSh dollaryn qurap, 2018 jylǵy qańtar-shildemen salystyrǵanda 1,7 paıyzǵa artqan. Onyń ishinde eksport – 32943,4 mln AQSh dollary, ımport – 20885,6 mln AQSh dollary boldy», - delingen komıtet aqparatynda.
Vedomstvo málimetinshe, 2019 jylǵy 1 qyrkúıektegi jaǵdaı boıynsha tirkelgen zańdy tulǵalardyń sany 441 526 birlik boldy. Bul ótken jylǵy sáıkes kezeńmen salystyrǵanda 2,3 paıyzǵa kóp. Onyń ishinde 100 adamnan kem qyzmetkerleri bar 432 775 zańdy tulǵa bar. Jumys istep turǵan zańdy tulǵalardyń sany - 297 933. Onyń 289 561-i shaǵyn kásiporyn sanalady.
Tutyný baǵasynyń ındeksi 2019 jylǵy tamyzda 2018 jylǵy jeltoqsanmen salystyrǵanda 103 paıyz boldy. Azyq-túlik taýarlarǵa baǵalar – 6,1, azyq-túlik emes taýarlarǵa 2,9 paıyz ósti. Al halyqqa arnalǵan aqyly kórsetiletin qyzmetterge baǵa 0,6 paıyz tómendedi. Ónerkásip ónimderine óndirýshi kásiporyndar baǵasy 2019 jylǵy tamyzda 2018 jylǵy jeltoqsanmen salystyrǵanda 3,1 paıyz joǵarylady.