Qazaqstannyń Syrtqy ister mınıstri Kýveıtke resmı saparmen bardy

ELЬ-KÝVEIT. QazAqparat – Búgin QR Premer-Mınıstriniń orynbasary – Syrtqy ister mınıstri Muhtar Tileýberdi Kýveıtke alǵashqy resmı saparmen keldi. Sapar aıasynda syrtqy saıası vedomstvosynyń basshysy Kýveıt Syrtqy ister mınıstri sheıh Ahmed Naser as-Sabahpen kelissózder júrgizdi, dep habarlaıdy QazAqparat.

QR SІM-nen málim etkendeı, taraptar Qazaqstan-Kýveıt qatynastarynyń oń qarqynyn atap ótip, ekijaqty yntymaqtastyqtyń qazirgi jaǵdaıy men perspektıvalaryn talqylady. Saýda-ekonomıkalyq jáne ınvestıtsııalyq seriktestikti tereńdetýdiń mańyzdylyǵyn atap ótti.

Ózara tıimdi áriptestikti odan ári damytýdy qamtamasyz etýge baǵyttalǵan Qazaqstan-Kýveıt úkimetaralyq komıssııasynyń jumysyn jandandyrýdyń mańyzdylyǵyna erekshe nazar aýdaryldy. Aǵymdaǵy jyldan bastap eki eldiń Syrtqy ister mınıstrleri osy komıssııaǵa birlesip tóraǵalyq etetin bolady.

Qazaqstan men Kýveıt SІM basshylary kópjaqty yntymaqtastyq sheńberindegi ózara is-qımyldyń deńgeıi men mazmunyna qanaǵattanǵanyn bildirdi. Óńirlik jáne halyqaralyq kún tártibindegi ózekti máseleler jóninde jan-jaqty pikir almasyldy.

Kelissózder qorytyndysy boıynsha Qazaqstan men Kýveıt Syrtqy ister mınıstrleriniń Birlesken málimdemesi qabyldandy.

Sapar aıasynda M.Tileýberdi Kýveıt Premer-Mınıstri sheıh Sabah as-Sabahpen kezdesip, QR Prezıdenti Q. Toqaevtyń Kýveıt Ámiri sheıh Naýaf ál-Ahmed ál-Djaber as-Sabahqa ústimizdegi jyldyń qazan aıynda Nur-Sultan qalasynda ótetin Azııadaǵy ózara is-áreket jáne senim sharalary jónindegi keńes (AÓSShK) VI sammıtine qatysýǵa shaqyrýyn tabys etti.

Sondaı-aq Qarjy mınıstri, Ekonomıka jáne ınvestıtsııalar máseleleri jónindegi memlekettik mınıstr - Kuwait Investment Authority Táýelsiz qory Dırektorlar keńesiniń tóraǵasy Abdýl-Ýahab ál-Rýsheıdpen kelissózder ótti. M.Tileýberdi suhbattasyn «Astana» Halyqaralyq qarjy ortalyǵynyń qyzmetimen tanystyryp, Kýveıt tarapyn AHQO-men yntymaqtastyqqa shaqyrdy.

QR Syrtqy ister mınıstri Alshaya Group Kýveıttiń iri ınvestıtsııalyq holdınginiń basshysy Mohammed ál-Shaıamen kezdesti. Kýveıttik bıznesmen óz kompanııasynyń Qazaqstannyń naryǵyna qatysýyn keńeıtýge múddeliligin bildirdi. Qazirgi ýaqytta kompanııa QR-da Starbucks kofehanalar jelisin, Mothercare balalar kıim dúkenderin keńeıtý, sondaı-aq Victoria 's Secret, American Eagle, Claire' s jáne basqa da jańa halyqaralyq saýda brendterin tartý boıynsha josparlardy qarastyrýda.