Qazaqstannyń sý zańnamasy halyqaralyq prıntsıpterge sáıkestendiriledi

NUR-SULTAN. QazAqparat – Eldegi sý resýrstaryn paıdalanýdy retteıtin zańnama halyqaralyq quqyq prıntsıpterine sáıkestendiriledi. Bul týraly QR Premer-Mınıstriniń orynbasary Eraly Toǵjanov aıtty, dep habarlaıdy QazAqparat tilshisi.

Parlamenttik tyńdaýda sý rersýrstaryn damytýdyń keleshegi týraly baıandama jasaǵan vıtse-premer jańa Sý kodeksinde qandaı negizgi baǵyttar redaktsııaǵa ushyraıtynyn aıtty.

«Sý kodeksiniń jańa redaktsııadaǵy negizgi baǵyttary:

Birinshi. Eldiń sý-resýrstyq áleýetin saqtaý.

Ekinshi. Sý paıdalanýshylardy sý únemdeý tehnologııalaryn paıdalanýǵa yntalandyratyn tetikterdi aıqyndaý.

Úshinshi. Monıtorıngti tsıfrlandyrý, Qazaqstannyń sý resýrstary áleýetin esepke alý jáne boljaý, sondaı-aq sý resýrstaryn basqarýdaǵy ǵylymnyń rólin arttyrý.

Tórtinshi. Ulttyq zańnamany halyqaralyq quqyq prıntsıpterimen úılestirý», - dedi Eraly Toǵjanov.

Onyń sózine qaraǵanda, jańa Sý kodeksiniń jáne ilespe zań jobasynyń tujyrymdamalary ázirlengen.

Endi zań jobalarynyń taraýlary men baptary daıyndalyp jatyr.

«Kodeks jobasy qyrkúıekte Prezıdent Ákimshiligine, 2023 jyldyń birinshi jartyjyldyǵynda Parlament Májilisine engiziledi», - dedi Úkimet basshysynyń orynbasary.

Májilis tóraǵasy Erlan Qoshanovtyń málimeti boıynsha, 2040 jylǵa qaraı Qazaqstanda sý tutyný 46 paıyzǵa artady.