Qazaqstannyń sot qorǵaý deńgeıi EYDU joǵary standarttaryna saı - N. Nazarbaev

ASTANA. QazAqparat - Qazaqstan Respýblıkasynyń ádilet júıesi jáne quqyqtyq ústemdigi ashyqtyqtyń, kásibıliktiń jańa sapaly satysyna shyǵyp otyr, dep atap ótti QR Prezıdenti Nursultan Nazarbaev Parlament palatalarynyń birlesken otyrysynda.

«Qazaqstandyqtardyń jáne bıznes sýbektileriniń quqyqtaryn sot arqyly qorǵaý deńgeıi endi Ekonomıkalyq yntymaqtastyq jáne damý uıymynyń joǵary standarttaryna saı keledi», - dep atap ótti N.Nazarbaev.

Memleket basshysynyń sózi boıynsha, qazirgi ýaqytta elimizdegi sot zaldarynyń 75 paıyzy aýdıojazba júıelerimen qamtamasyz etilgen jáne bul jumys ary qaraı jetildirile bermek.

«Bizde sot isin qaraýdyń bes deńgeıi bolǵan edi, qazir ol úshke deıin qysqartyldy», - dep atap ótti Prezıdent.

Elbasynyń habarlaýynsha, sot korpýsynyń biliktiligin arttyrý maqsatynda jyl saıyn sýdıa qyzmetine úmitker 100 maman oqytylyp otyrmaq.

Sondaı-aq, Joǵarǵy Sot janynda Sot Tóreligi akademııasy quryldy.

Elbasy aǵymdaǵy jyldyń eki aıy ishinde sot qazylar alqasyna sýdıalardyń qyzmetine qatysty barlyǵy 50 qazaqstandyq shaǵym túsirip úlgergendigine toqtalyp ótti.

«Atqarý óndiristeriniń deni jeke sot oryndaýshylarǵa berilgen. Olardyń sany búginde 1046. Jergilikti polıtsııa quryldy. Polıtsııalardyń halyq aldynda esep berý tájirıbesi engizilýde. Qazir kez kelgen azamat quqyq qorǵaý organdarynyń jumysyn ınteraktıvti múmkindikter arqyly baǵalaı alady. Sonymen qatar quqyq buzýshylyqtardyń elektrondy kartasy bar», - dep atap ótti N.Nazarbaev.