Qazaqstannyń SІM Qyrǵyzstanǵa gýmanıtarlyq kómek qalaı jetkizilip jatqany týraly aıtty

BІShKEK. QazAqparat –Prezıdent Qasym-Jomart Toqaevtyń tapsyrmasyna sáıkes, Qyrǵyzstanǵa jalpy salmaǵy 10 000 tonna qazaqstandyq un túrindegi gýmanıtarlyq kómek jetkizile bastaǵan edi. Qazaqstannyń Syrtqy ister mınıstrligi gýmanıtarlyq kómektiń qalaı jetkizilip jatqany týraly tolyq aqparat berdi, dep habarlaıdy QazAqparat.

18 mamyrda onyń salmaǵy 4 500 tonna quraıtyn alǵashqy partııasy 75 temir jol vagonymen tasymaldandy. Onyń 30-y Bishkekke jetkizilse, qalǵandary eldiń basqa óńirlerine jiberildi.

«Qazirgi kezde mınıstrler kabıneti densaýlyq saqtaý mınıstrligimen birlesip undy halyqqa, onyń ishinde ásirese áleýmettik jaǵynan nashar qamtylǵan adamdarǵa taratý máselesin pysyqtap jatyr. Meniń oıymsha, qazirgi jaǵdaıda Qazaqstan Respýblıkasynyń tarapynan úlken kómek bolyp otyr», - dedi Qyrǵyzstannyń Aýyl, orman jáne sý sharýashylyǵy mınıstriniń orynbasary Azamat Mýkashev.

Qyrǵyz tarapynyń aqparatyna qaraǵanda, gýmanıtarlyq kómektiń birinshi partııasy Memlekettik materıaldyq rezerv mekemesiniń Qyrǵyzstannyń Qara-Balta, Balyqshy qalalaryna, ıaǵnı soltústigindegi qoımalaryna bólindi. Unnyń qalǵan bóligi eldiń ońtústigindegi Osh pen Djalal-Abadqa tasymaldanady.

«Gýmanıtarlyq kómek ataýly túrde jetkizilip otyr, sondyqtan atalǵan un bul oblys ortalyqtarynda, osy ónimge zárý túpki alýshylar arasynda taratylmaq. Áleýmettik jaǵynan nazar qamtylǵan adamdarǵa tegin beriledi», – dep atap ótti A. Mýkashev.

Osy oraıda qyrǵyz tarapy Qazaqstan Úkimetine jáne tıisti memlekettik organdaryna gýmanıtarlyq kómekti jedel jetkizgeni úshin aıryqsha alǵysyn bildirdi. Eske salsaq, ony bólý máselesi Qazaqstan Prezıdenti Q. Toqaev pen Qyrǵyzstan Prezıdenti S. Djaparovtyń 2021 jyldyń 1 mamyrynda bolǵan telefondyq suhbatynda qarastyrylǵan bolatyn.

Qazaqstannyń Qyrǵyzstandaǵy Elshisi Rápil Joshybaev Qazaqstannan ótken jyly indet bastalǵan kezde-aq gýmanıtarlyq kómek sheńberinde 5 000 tonna otandyq un ónimi Qyrǵyzstanǵa jiberilgenin atap ótti. «2020 jyly kúzde Úkimettiń sheshimimen elimizde jasalǵan 400 dana portatıvti jeldetý apparaty, 2 mıllıon betperde jiberildi. Buǵan qyrǵyz halqy rızashylyǵyn bildirip jatyr. Biz qıyn kezde árqashan kómektesemiz degen oıdamyn».

Gýmanıtarlyq júktiń qalǵan bóligi mamyrdyń aıaǵyna deıin jetkiziledi dep kútilýde.

Oǵan qosa, ónimdiligi joǵary kúzdik bıdaıdyń 1 myń tonnasyn jetkizý máselesi sheshilýde. Bul kómek tek halyqtyń nashar qamtylǵan bóligine ǵana emes, Qyrǵyzstannyń fermerlerine de berilip, olar óz egistik alqaptaryna sapaly tuqym egetin bolady.