Qazaqstannyń sheteldiktermen nekede turǵan azamattaryna jer berýge tyıym salynady

ASTANA. QazAqparat - Jerdi paıdalaný jónindegi mindettemeler men jaýapkershilik kúsheıtiledi. Bul týraly Parlament Májilisinde «Qazaqstan Respýblıkasynyń keıbir zańnamalyq aktilerine jer qatynastaryn retteý máseleleri boıynsha ózgerister men tolyqtyrýlar engizý týraly» zań jobasyn tanystyrý barysynda Aýyl sharýashylyǵy vıtse-mınıstri Erlan Nysanbaev málim etti, dep habarlaıdy QazAqparat.

«Aýyl sharýashylyǵy jerleri tıimdi paıdalanylýy jónindegi mindettemelerdi oryndaý boıynsha biryńǵaı talaptardy belgileý maqsatynda jer ýchaskesin jalǵa berý shartynyń úlgilik nysany bekitiledi. Jalǵa berýdiń úlgilik shartynda jalǵa alýshynyń jerdi paıdalaný jónindegi mindettemeleri men jaýapkershiligin kúsheıtý kózdelgen. Bul rette shartta jalǵa alýshynyń konkýrstyq usynysta kórsetken mindettemeleri men alǵa qoıylǵan nıeti qamtylatyn bolady. Jerdi paıdalaný men qorǵaýǵa memlekettik baqylaýdy kúsheıtý maqsatynda zań jobasymen aýdandyq atqarý organdardyń quzyretine aýyl sharýashylyǵy jerleriniń tıimdi paıdalanylýy men qorǵalýyna memlekettik baqylaý úlgileri qarastyrylady», - dedi vıtse-mınıstr.

Onyń sózine qaraǵanda, aýyl sharýashylyǵy jerleriniń úlken kólemde bir qolǵa berilýin boldyrmaý maqsatynda zań jobasynda ár oblystyń aýdanynyń sheginde qazaqstandyqtarǵa berilýi múmkin eń joǵary mólsherin belgileý kózdelgen. Bul rette aýyl sharýashylyǵy jerlerin elimiz boıynsha shekti mólsherden asatyn kólemde bir qolǵa ótýine jol berilmeıdi.

«Aýyl sharýashylyǵy mınıstrligi qazirgi ýaqytta tıisti esepteý ádistemesin ázirleýde, onda elimizdiń árbir óńiriniń jaǵdaıy men ereksheligi eskerilýde. Budan basqa, zań jobasynda shekaralyq beldeý jáne shekara aýmaǵynda ornalasqan jer telimderin sheteldikterge, azamattyǵy joq adamdarǵa, Qazaqstan Respýblıkasynyń sheteldiktermen nekede turǵan azamattaryna nemese sheteldik zańdy tulǵalarǵa, sondaı-aq Qazaqstan Respýblıkasynyń sheteldikter qatysatyn zańdy tulǵalaryna berýge tyıym salynady. Memlekettik shekaralyq beldeýinde ornalasqan aýyl sharýashylyǵy jerlerin jekemenshikke de, jer paıdalanýǵa da berilmeıdi. Atalǵan aýmaqtarda aýyl sharýashylyǵy jerlerin jergilik halyqtyń muqtajdyqtaryna jaıylym, shabyndyq retinde paıdalanýǵa ruqsat etiledi. Memlekettik shekara aýmaǵynda ornalasqan aýyl shraýalyǵy jerleri tek Qazaqstannyń azamattaryna jáne zańdy tulǵalaryna ýaqytsha jer paıdalaný quqyǵyna beriledi»,-dedi Nysanbaev.