Qazaqstannyń sheteldegi áskerı attasheleriniń 2019 jylǵy jumysy qorytyndylandy
21:40, 15 Qarasha 2019
NUR-SULTAN. QazAqparat - Nur-Sultan qalasynda QR Qorǵanys mınıstrliginiń shet el memleketterde akkredıttelgen áskerı attashelerimen keńes ótti, dep habarlaıdy QazAqparat.
Mınıstrlikten málim etkendeı, keńes barysynda áskerı attashelerdiń 2019 jylǵy qyzmetteriniń qorytyndysy shyǵarylyp, keler jylǵa mindetter aıqyndaldy. Olarǵa Qarýly Kúshterdiń, áskerı yntymaqtastyqtyń damýyna, sondaı-aq qarýlaný men áskerı tehnıkany tehnologııalyq jetildirýge jáne modernızatsııalaýǵa qolǵabys etý qajettigi týraly talaptar jetkizildi.
«Vedomstvo basshysy Qorǵanys mınıstrliginiń sheteldegi áskerı attasheleri apparattarynyń qyzmetterine qatysty tapsyrmalar júktedi. Búgingi kúni Qazaqstannyń áskerı attasheleri QR Qarýly Kúshteriniń múddelerine 25 elde ókildik etedi: Ortalyq Azııada, Taıaý Shyǵysta, AQSh-ta, Eýropada jáne Azııa elderinde», - delingen taratylǵan habarlamada.