Qazaqstannyń shaǵyn qalalarynda Jedel basqarý ortalyqtary qurylady

ASTANA. QazAqparat - Polıtsııa qyzmetkerleriniń keshendi kúshterin basqarý úshin oblys ortalyqtarymen birge Qazaqstannyń shaǵyn qalalarynda da Jedel basqarý ortalyqtary qurylady. Bul týraly OKQ-da ótken baspasóz máslıhaty barysynda Іshki ister mınıstri Qalmuhanbet Qasymov málim etti, dep habarlaıdy QazAqparat tilshisi.

«Táýlik boıy qyzmet atqaratyn polıtsııanyń keshendi kúshterin basqarý úshin Jedel basqarý ortalyqtary jumys isteıdi. Mundaı mekeme árbir oblys ortalyǵynda bar. Qazirgi ýaqytta krımınogendik jaǵdaıy qıyn shaǵyn qalalarda da salynýda. Búgingi tańda atalmysh ortalyqtar Jańaózen, Rýdnyı, Şýchınsk, Semeı jáne Hromtaýda salynyp jatyr. 2019 jyly Jedel basqarý ortalyqtaryn Qapshaǵaı, Rıdder, Temirtaý ján Stepnogorsk qalalarynda qurý josparlanyp otyr», - dedi Qalmuhanbet Qasymov.

Mınıstrdiń aıtýynsha, jyl basynan beri qylmys sany 8 paıyzǵa (175 myńǵa deıin) azaıǵan. Asa aýyr (-5 paıyz) jáne aýyr qylmystar (-17 paıyz), ortasha (-8 paıyz) jáne aýyr emes qylmys túrleriniń sany (-10 paıyz) qysqarǵan. Sonymen qatar, tonaý 10 paıyzǵa, buzaqylyq 17 paıyzǵa, urlyq 9 paıyzǵa, qoǵamdyq oryndardaǵy qylmystar 8 paıyzǵa tómendegen.

«Degenmen, urlyq sany burynǵysha eń kóp taralǵan qylmys túri bolyp otyr. Onyń úlesi jalpy qylmystardyń kórsetkishi ishinde 70 paıyzdy quraıdy», - dedi mınıstr.