Qazaqstannyń Saýda mınıstri Qytaıǵa saparlaıdy

ASTANA. QazAqparat – Premer-Mınıstrdiń orynbasary – Saýda jáne ıntegratsııa mınıstri Serik Jumanǵarın Qytaıǵa saparmen barady. Bul týraly Syrtqy ister mınıstrliginiń resmı ókili Aıbek Smadııarov aptalyq brıfıngide aıtty, dep habarlaıdy QazAqparat.

«2023 jylǵy 13-17 tamyzda taýar aınalymyn ulǵaıtý jáne Qytaı tarapymen saýda-ekonomıka baılanystaryn jolǵa qoıý maqsatynda QR Premer-Mınıstriniń orynbasary – Saýda jáne ıntegratsııa mınıstri Serik Jumanǵarınniń Qytaı Halyq Respýblıkasynyń – Shenchjen, Shandýn, Beıjiń jáne Úrimshi qalalaryna jumys sapary josparlanýda», - dedi resmı ókil.

Sapar aıasynda birlesken kásiporyndar qurý, et ónimderiniń eksportyn ulǵaıtý, ınvestıtsııalar tartý jáne kólik-logıstıka yntymaqtastyǵy salasynda ekijaqty kelissózder júrgizý josparlanýda.

Sonymen birge qazaqstandyq delegatsııa Úrimshi qalasynda ótetin «Qytaı-Eýrazııa» EKSPO halyqaralyq kórmesine barady.

Buǵan deıin Aıbek Smadııarov Qytaımen vızasyz rejım áli ornamaǵanyn, bul sheshim jyl sońyna deıin qabyldanýy múmkin ekenin aıtqan edi.