Qazaqstannyń salyq qyzmeti blokcheın qoldanbaq

ASTANA. QazAqparat - QR Qarjy mınıstrliginiń Memlekettik kirister komıteti salyqty ákimshileýde blokcheın tehnologııasyn qoldanýdy josparlap otyr. Bul týraly búgin Global Challenges Summit 2018 forýmy aıasyndaǵy baspasóz máslıhatynda Innovatsııalyq tehnologııalar parkiniń bas dırektory Sanjar Kettebekov aıtty, dep habarlaıdy QazAqparat tilshisi.

«Búginde blokcheın tehnologııasyn engizý boıynsha maqsatty túrde jumystar júrgizilip jatyr. QR Qarjy mınıstrligi Memlekettik kirister komıtetiniń blokcheın tehnologııasyn paıdalanyp, qosylǵan qunǵa arnalǵan salyqty ákimshileý boıynsha úlken jobasy bar», - dedi ol.

Sanjar Kettebekov Innovatsııalyq tehnologııalar parkiniń ózge de jobalaryna toqtaldy. Máselen, medıtsına salasynda, atap aıtqanda onkologııada jasandy ıntellekti engizý jobasy iske qosylmaq.

«ıAǵnı, emdeý hattamalary, tipti aýrýdy dıagnostıkalaý jaqsara túsýi múmkin», - dep atap ótti ol.

Sonymen qatar onyń aıtýynsha, elimizdiń taý-ken metallýrgııa kesheninde 3D-prınterge arnalǵan untaq óndirisi synaqtan ótip jatyr.

«Bul joǵary qosylǵan qunnyń úlgisi sanalady. Óndiriste alynǵan bul untaqty bolashaqta mashına jasaý salasynda qoldanýǵa bolady. Biz bul baǵytty Airbus Industries syndy frantsııalyq kompanııalarmen birlesip damytamyz dep úmittenemin», - dedi Sanjar Kettebekov.