Qazaqstannyń Reseımen kópjaqty yntymaqtastyqty odan ári nyǵaıtý ustanymyn rastaımyn - Toqaev

ASTANA. QazAqparat – Otandyq jýrnalısterdiń aldynda geosaıası tóńiregimizde bolyp jatqan oqıǵalardy shynaıy baıandaý jaýapty mindeti tur. Bul týraly Prezıdenttiń BAQ salasyndaǵy syılyǵy men granttaryn tapsyrý kezinde Memleket basshysy Qasym-Jomart Toqaev aıtty, dep habarlaıdy QazAqparat tilshisi.

«Otandyq jýrnalısterdiń aldynda shetelde jáne de árıne, bizdiń geosaıası tóńiregimizde oryn alyp jatqan oqıǵalardy shynaıy baıandaýda jaýapty mindet tur. Sizder jalpy bul mindetti tabysty oryndap júrsizder. Máselen, taıaýda Reseıde bolǵan alańdatarlyq oqıǵany jarııalaý kezinde solaı boldy. Bizdiń azamattarymyz kóterilis áreketin shyn máninde úlken alańdaýshylyqpen qabyldady. Bul túsinikti de. Óıtkeni, Qazaqstan men Reseı arasynda álemdegi eń uzyn memlekettik shekara bar. Biz biryńǵaı ekonomıkalyq keńistikte turmyz. Bizdi myńdaǵan gýmanıtarlyq baılanys pen qarym-qatynas biriktiredi. Bastapqy kezde-aq meniń tarapymnan Reseı Federatsııasy Prezıdentimen telefonmen áńgime barysynda onyń konstıtýtsııalyq tártip pen zańdylyqty saqtaý jáne nyǵaıtýǵa baǵyttalǵan is-áreketine tolyqtaı qoldaý bolatyny málimdeldi. Reseı memleketiniń áleýeti men onyń jalpyulttyq kóshbasshylyq tulǵasyn eskere otyryp, eshqandaı kúdik bolǵan joq», - dedi Qazaqstan Prezıdenti.

Memleket basshysy tipti Reseı Prezıdentimen aldaǵy kúzde bolatyn sapary da talqylanǵanyn atap ótti.

«Búgin de múmkindikti paıdalana otyryp, Qazaqstannyń Reseımen uzaqmerzimdi jáne turaqty strategııalyq áriptestik formatyndaǵy kópjaqty yntymaqtastyqty odan ári nyǵaıtýǵa qatysty qaǵıdatty ustanymyn rastaımyn. Mundaı ustanym halqymyzdyń múddesine tolyq sáıkes keletinine senimdimin», - dedi Qasym-Jomart Toqaev.