Qazaqstannyń Reseıdegi saýda ókildigi taratyldy
«Qazaqstan Respýblıkasynyń Saýda jáne ıntegratsııa mınıstrliginiń «Qazaqstan Respýblıkasynyń Reseı Federatsııasyndaǵy Saýda ókildigi» memlekettik mekemesi taratylsyn», - dep jazylǵan qaýlyda.
Qujat qol qoıylǵan kúninen bastap qoldanysqa engiziletini de aıtylǵan.
Eske salsaq, aıdyń basynda Qazaqstan Reseıdegi saýda ókildigi mekemesin taratatyny habarlanǵan bolatyn.
Keıin Qarjy mınıstri bul sheshimniń sebebin túsindirdi.
«Jaqynda osy jaıynda Saýda jáne ıntegratsııa mınıstrligi málimdeme jasady. Bul turǵyda qajet emes qurylymdardy ońtaılandyrý júrip jatyr. Reseımen tyǵyz qarym-qatynas Eýrazııalyq ekonomıkalyq komıssııa aıasynda da bar ekenin eskerý kerek. Ol jaqta Qazaqstannyń ókildigi jetkilikti, ıaǵnı barlyq saladaǵy máseleni retteı alatyn, sonyń ishinde kásipkerlik qyzmette óte saýatty adamdar bar. Sonymen qatar, Elshilik jumys istep tur. Túrli memlekettik qurylymdardan da tıisti ókilder qyzmet etip júr», - degen bolatyn Erulan Jamaýbaev.