Qazaqstannyń Prezıdent orkestri Býrsa kórermenderin tánti etti

BÝRSA. QazAqparat – Túrkııanyń Býrsa provıntsııasynda II Halyqaralyq áskerı orkestrler festıvali ótip jatyr, onda Qazaqstannyń Memlekettik kúzet qyzmeti Prezıdent orkestri óner kórsetti, dep habarlaıdy QazAqparat menshikti tilshisi.

Býrsa qalasyndaǵy Hýdavendıgıar atyndaǵy ortalyq saıabaqta kontsert ótti, onda bes elden – Qazaqstan, Ázerbaıjan, Moldavııa, Gagaýzııa jáne Túrkııadan on orkestr óner kórsetti. Olardyń árqaısysy kóptegen ulttyq, klassıkalyq jáne zamanaýı mýzykalyq shyǵarmalardy oryndady. Bul rette Moldavııadan kelgen mýzykalyq ujymdy bı toby súıemeldedi.

Orkestrler arasynda Qazaqstan mýzykanttary túrik kórermeniniń nazaryn erekshe aýdardy. Olar ulttyq, álemdik jáne túrik shyǵarmalaryn, sondaı-aq tanymal ánderdiń kaver-nusqalaryn oryndady. Sonymen qatar, «Dınle» túrik kompozıtsııasy kórermenniń erekshe kóńilinen shyqty, ol «tyńdańyz» degendi bildiredi. Túrkııa kórermenderi Qazaqstannan kelgen ártistermen birge án aıtyp, oryndarynan turyp qoshemet kórsetti.

Sonymen qatar, Prezıdent orkestri tanymal kompozıtorlardyń «Qazaq eli», «Qazaq valsi», «Azııa daýysy», «Saltanatty sherý» atty shyǵarmalaryn, «Súgirdiń termesi» men «Qazaq sývenıri» halyq ánderin oryndady.

Qazaqstannyń Prezıdent úrmeli orkestrine Qurmet Beısembaev dırıjerlik etti.