«Qazaqstannyń pedagogıkalyq besigi» kitabyn ádistemelik qural retinde paıdalanýǵa bolady - Dastan Sátbaı

QYZYLORDA. QazAqparat - Tuńǵysh Prezıdent kúni qarsańyna oraılastyrylyp shyǵarylǵan «Qazaqstannyń pedagogıkalyq besigi» kitaby Mánshúk Mámetova atyndaǵy gýmanıtarlyq kolledjde ǵalymdar qaýymynyń qatysýymen talqylandy. Kitapty aıtýly oqý ornyn 35 jyldan astam ýaqyt basqaryp kele jatqan belgili ustaz, kolledj dırektory Álıma Jaqypqyzy Ábdihalyqova qurastyryp shyǵardy.

Jıynda sóz alǵandar bul eńbektiń kórneki ádistemelik qural retinde oqý oryndarynda paıdalanýǵa bolatynyn aıtty. Tarıh ǵylymdarynyń doktory Dastan Sátbaı: «Kez-kelgen ustaz Elbasynyń keleli jıyndardyń minbesinen bilim salasy men ustazdar máselesi týraly aıtqan sózderin kitaptan taba alady. Mundaı eńbekterdi kúndelikti paıdalaný arqyly ǵana biz ulttyq ıdeologııany boıymyzǵa sińire alamyz», - degen pikirin bildirdi.

Bul eńbek Uly jeńistiń 70 jyldyq merekesin toılaǵan jyly shyǵarylyp otyr. Onda Táýelsiz elimizdiń qalyptasý joly, Prezıdentimiz N. Nazaraevtyń bilim taqyrybyndaǵy ataqty sózderi men dáristeri, sheteldik basylymdardaǵy ózekti maqalalary qamtylǵan. Sonymen qatar elimizde pedagog kadrlardy daıarlaýǵa arnalǵan negizgi orta arnaýly bilim berý mekemeleriniń biri retinde Qyzylordadaǵy Mánshúk Mámetova atyndaǵy gýmanıtarlyq kolledjiniń tarıhı derekterinen de syr shertedi. Kitaptyń úlken patrıottyq taraýy soǵys taqyrybyna arnalǵan, onda 1943 jyly «Pravda» jáne «Izvestııa» gazetterinde jarııalanǵan jáne 2 mıllıon 631 myń 503 adam qol qoıǵan «Qazaq halqynyń qazaq jaýyngerlerine haty» keltirilgen. Sondaı-aq, Mánshúktiń erligi jáne belgili keńes jazýshysy Ilıa Erenbýrgtiń qazaq jaýyngerleri týraly essesi kitaptyń eleýli júgin kóterip tur.