Qazaqstannyń ózge elderge jasaǵan qaıyrymdylyq kómeginiń kólemi belgili boldy

ASTANA. QazAqparat - Sońǵy 20 jyldyń ishinde Qazaqstan ózge elderge 300 mln. dollardan astam somaǵa qaıyrymdylyq kómegin kórsetti. Bul týraly búgin Qazaqstandaǵy BUU-nyń turaqty úılestirýshisi Norısıma Shımomýra aıtty, dep habarlaıdy QazAqparat.

«Meniń bilýimshe, sońǵy 20 jyldyń ishinde ózge elderge kórsetilgen kómek kólemi 300 mln. dollardy quraıdy. Sonymen qatar Qazaqstan EYDU standarttaryna saı keletin damýǵa resmı kómek júıesin qurý arqyly óz-ózin tanytty. Taıaýda ǵana Japonııa, Qazaqstan, sonymen qatar BUU Damý baǵdarlamasy birlesip, genderlik teńdikti kúsheıtý boıynsha Aýǵanstanǵa kómek kórsetý bastamasyn qurdy. Mundaı kómek  densaýlyq saqtaýda jáne memlekettik qyzmette kórsetiletin bolady», - dedi ol QR Parlamenti Senatynda BUU-nyń turaqty damý maqsattaryn tanystyrǵannan keıin.

Onyń atap ótýinshe, Turaqty damý maqsattary úsh sıpattamasy boıynsha Qazaqstanda eki negizgi maqsat bar. Onyń biri  - turaqty damý maqsattaryna qol jetkizý, onyń ishinde genderlik teńdik pen ekonomıkany «jasyl» damytý salasyndaǵy jumystardy kúsheıtý. Ekinshiden donorlyq damýshy el retinde Qazaqstannan qarjylaı resýrstar men tájirıbe almasý arqyly basqa elderdiń Turaqty damý maqsattaryna qol jetkizýine járdem berýi kútiledi.

Óz kezeginde elimizdiń Syrtqy ister vıtse-mınıstri Erjan Ashyqbaev strategııalyq baǵdarlamalyq qujattardyń basym bóligi turaqty damý maqsattaryna sáıkes keletindigin atap ótti. Olardyń qatarynda  «Aqparattyq Qazaqstan», «Nurly jol» syndy baǵdarlamalar bar.