Qazaqstannyń óńirlik derjava bolýynyń naqty alǵysharttary bar – grýzııalyq ǵalym
Bul pikirin ol Grýzııanyń jetekshi joǵary oqý ornyndarynyń biri Sýhýmı memlekettik ýnıversıtetinde Qazaqstandaǵy saıası jáne ekonomıkalyq ózgerister, sondaı-aq aldaǵy prezıdenttik saılaýǵa arnalǵan dóńgelek ústel barysynda málim etti, dep habarlaıdy QazAqparat.
QR Syrtqy ister mınıstrliginiń baspasóz qyzmeti taratqan aqparatqa qaraǵanda, 2020 jyly qazaqtyń uly aqyny, jazýshysy men oıshylynyń 175 jyldyq mereıtoıyna oraı ashylǵan Abaı Qunabaıuly atyndaǵy aýdıtorııada ýnıversıtettiń stýdentteri, professor-ustazdar, saıasattanýshylar men Grýzııanyń jetekshi sarapshylary Qazaqstannyń jańa saıası-ekonomıkalyq reformalarymen tanysty.
QR Prezıdenti Qasym-Jomart Toqaevtyń bastamasymen Ádiletti Qazaqstan qurý tujyrymdamasy týraly grýzın tilinde aqparattyq fılm kórsetildi.
Sýhýmı memlekettik ýnıversıtetiniń rektory, professor, saıasattaný ǵylymdarynyń doktory, dıplomat Zýrab Honelıdze óz sózinde álemdegi geosaıası ahýaldyń damý úrdisin jáne álemdik úlginiń kóppolıarly modelin qalyptastyrýdy eskere otyryp, Qazaqstandaǵy saıası qaıta qurýdyń ýaqtylylyǵyn atap ótti.
Ǵalym sózinde Qazaqstanda aldaǵy prezıdenttik saılaý sátti ótetinine senimdi ekendigin, Grýzııa, dostas el retinde qazaq halqynyń tańdaýyn qurmetteıtinin jáne qoldaıtynyn jetkizdi.
Saıasattaný ǵylymdarynyń doktory, Kavkaz halyqaralyq ýnıversıtetiniń professory Vahtang Maısaıdyń pikirinshe, Qazaqstannyń óńirlik derjava bolýynyń naqty alǵysharttary bar, ol kópvektorly syrtqy saıasattyń pragmatıkalyq modelimen jáne álemdegi geosaıası jáne geoekonomıkalyq jaǵdaıdyń týrbýlenttiligine beıimdeletin «baısaldy» ekonomıkamen nyǵaıtylady.
Grýzııanyń eńbek sińirgen jýrnalısti, saıasattanýshy Badrı Nachkebııdiń baǵalaýy boıynsha, reformalar táýelsiz Qazaqstan tarıhynda jańa kezeń ashady. «Halyq únine qulaq asatyn memleket» tujyrymdamasy, «Qazaqstan halqyna» qorynyń jumysy, monopolııasyzdandyrý boıynsha qabyldanǵan sharalar basqa elder, sonyń ishinde Grýzııa úshin úlgi bola alady.
Dóńgelek ústelge qatysýshylar Memleket basshysynyń Qazaqstandy odan ári saıası, ekonomıkalyq jáne ınstıtýtsıonaldyq jańǵyrtý jónindegi batyl sheshimderine qyzyǵýshylyq tanytty, sondaı-aq reformalardyń áleýmettik aspektisin atap ótip, halyqtyń ál-aýqatyn arttyrýdyń mańyzdylyǵyna nazar aýdardy.
Talqylaý barysynda dıplomatııalyq qatynastaryna 30 jyl tolǵan Qazaqstan-Grýzııa yntymaqtastyǵynyń jaı-kúıi men perspektıvalary talqylandy. Taraptar Qazaqstandaǵy jańa saıası jáne ekonomıkalyq reformalar ózara is-qımyldyń barlyq salalarynda qazaq-grýzın qatynastaryn jandandyratynyna senim bildirdi.