Qazaqstannyń óńdeý ónerkásibiniń kólemi 2025 jylǵa qaraı 1,5 esege ósedi

NUR-SULTAN. QaAqparat – Qazaqstannyń óńdeý ónerkásibiniń kólemi 2025 jylǵa qaraı 1,5 esege ósedi. QR Indýstrııa jáne ınfraqurylymdyq damý mınıstrliginiń óńdeý ónerkásibin damytý jónindegi josparlaryn QR Indýstrııa jáne ınfraqurylymdyq damý mınıstri Beıbit Atamqulov Úkimet otyrysynda baıandady.

«Qazirgi ýaqytta biz óńirler men salalar boıynsha 2025 jylǵa deıin óńdeý ónerkásibi óndirisiniń kólemi boıynsha josparly kórsetkishterdi aıqyndadyq. Memleket basshysynyń óńdeý ónerkásibin 2025 jylǵa qaraı 1,5 esege arttyrý jónindegi tapsyrmasyn oryndaýdy mınıstrlik jergilikti atqarýshy organdarmen birlesip júzege asyrady», - dedi mınıstr.

QR Prezıdenti Qasym-Jomart Toqaev óz Joldaýynda 2025 jylǵa qaraı óńdeý ónerkásibi ósimin 1,5 esege arttyrýdy tapsyrdy. Bul úshin salada jyl saıynǵy ósim ótken jylǵa qaraǵanda orta eseppen 10,8% bolýy tıis. Bul mindet «Nur Otan» partııasynyń saılaýaldy tuǵyrnamasyna engizilgen.

2021 jylǵa óńdeý ónerkásibiniń naqty kólem ındeksiniń (NKI) 2020 jylmen salystyrǵanda 5,8% ósýi josparlanǵan.

Qara metallýrgııada bıyl NKI deńgeıi – 105% dep belgilengen.

Elimizde 2021 jyly ferroqorytpa óndirisi 10,4%, bolat óndirisi 17% jáne prokat óndirisi 19% artady dep boljanyp otyr.

2025 jylǵa deıin óndiris kólemin jylyna 4 mln. tonna bolatqa deıin jetkizip, «ArselorMıttal Temirtaý» kompanııasynyń negizgi tehnıkalyq qýatyn jańǵyrtý aıaqtalady. Salynatyn ınvestıtsııa kólemi 1,3 trln. teńge.

2021 jyly myrysh óndirý kólemi 18,6%, qorǵasyn 18,8%, mys kontsentraty 9%, alıýmınıı óndirisi 6% ulǵaıtylady.