Qazaqstannyń óńdelgen taýarlar eksporty 19,8 mlrd AQSh dollaryna jetti
QR Saýda jáne ıntegratsııa mınıstrliginiń málimetinshe, elimizden óńdelgen taýarlar eksporty 2021 jyly 28,3 paıyzǵa ósip, 19,8 mlrd AQSh dollaryna jetti. Qazaqstannan eksporttyń negizgi óńdelgen taýarlary mynalar: mystan jasalǵan mys jáne katodtar, ferroqorytpalar, ýran, ystyqtaı ılektelgen legırlenbegen bolattan jasalǵan jazyq ılek, munaı ónimderi, kúmis, óńdelmegen alıýmınıı, óńdelmegen myrysh, legirlenbegen bolattan jasalǵan jazyq ılek.
2021 jyly Qazaqstanǵa óńdelgen taýarlar ımporty 5,1 paıyzǵa artyp, 38,3 mlrd AQSh dolly boldy. Elimizge ımporttyń negizgi taýarlary mynalar: esepteý mashınalary, avtomobılderge arnalǵan shanaqtar, jeńil avtomobılder jáne avtomobılder men traktorlarǵa arnalǵan qosalqy bólshekter, telefon apparattary, bólshek saýda úshin ólshep oralǵan dárilik zattar. Sondaı-aq vaktsınalar, qan sarysýy, qan da ımporttalǵan.
2021 jyly Qazaqstannyń óńdelgen taýarlar boıynsha negizgi saýda áriptesteri qatarynda Reseı (óńdelgen taýarlardyń ekijaqty saýdasynyń jalpy kólemi 19,97 mlrd dollar), Qytaı (óńdelgen taýarlardyń taýar aınalymy shamamen 12,7 mlrd dollar) jáne Ózbekstan (óńdelgen taýarlarmen ózara saýda kólemi 2,6 mlrd dollar) bar.
Al óńdelgen taýarlar saýdasy boıynsha negizgi seriktes elderdiń ondyǵyna myna elder kirdi: Túrkııa, Germanııa, AQSh, Ulybrıtanııa, Japonııa, Frantsııa, Italııa, Ońtústik Koreıa, Ýkraına, Nıderlandy, Belarýs, Qyrǵyzstan.