Qazaqstannyń olımpıada komandasy Tokıoǵa kelip jetti

TOKIO. QazAqparat - Olımpıada delegatsııasynyń alǵashqy bóligi Japonııaǵa keldi. Nur-Sultan men Tokıo arasyndaǵy ushý uzaqtyǵy 7 saǵat 15 mınýtty qurady, dep habarlaıdy QazAqparat Ulttyq olımpıada komıtetine silteme jasap.

Talapqa saı delegatsııanyń 128 múshesi koronavırýsty ınfektsııaǵa baılanysty PTR test tapsyrdy. Qazaqstandyqtar tapsyrǵan búkil test teris nátıje kórsetti.

Komandanyń áýejaıdaǵy barlyq protsedýrasy 4 saǵatqa jýyq ýaqytqa sozyldy.

«Uıymdastyrýshylardyń talaby boıynsha barlyq reglamentti saqtadyq. Ereje boıynsha sońǵy tórt saǵatta sportshylar koronavırýsty ınfektsııaǵa qatysty bes test tapsyrdy. Qazirgi tańda olar olımpıada aýylyna jaıǵasyp, tynyǵýda. Jaqyn ýaqytta kestege sáıkes jattyǵýdy bastaıdy», - dep habarlady Olımpıadadaǵy Qazaqstan Mıssııasynyń basshysy Elsııar Qanaǵatov.

17 shilde kúni Tokıodaǵy kún raıy ashyq, aýa temperatýrasy 32 gradýsqa deıin kóterilgen.

Ylǵaldylyq 52 paıyzdy kórsetip tur. 18 shildeden bastap sportshylar jattyǵýǵa kirisip, dárigerlerdiń baqylaýymen ystyq ári ylǵaldy klımatqa beıimdeledi.

18 shilde kúni olımpıada aýylyna sporttyq gımnastıka men akademııalyq esýden komanda ókilderi jaıǵasady.

23 shilde kúni Olımpıada oıyndarynda alǵash bolyp tórt qazaqstandyq sportshy baq synaıdy.

Sadaq atýdan irikteý kezeńinde S anjar Musaev, Ilfat Abdýllın, Denıs Gankın synǵa tússe, akademııalyq esýden Vladıslav ıAkovlev jarysty bastaıdy.