Qazaqstannyń monopolııaǵa qarsy qyzmetine 30 jyl toldy

NUR-SULTAN. QazAqparat – Elordada onlaın-rejımde Qazaqstan Respýblıkasynyń monopolııaǵa qarsy qyzmetiniń 30 jyldyǵyna arnalǵan «Memlekettiń ekonomıkalyq ál-aýqatyn arttyrýdaǵy básekelestik saıasattyń róli» atty halyqaralyq dóńgelek ústeli ótti, dep habarlaıdy QazAqparat tilshisi.

«Básekelestik saıasatyn damytý jáne qorǵaý ortalyǵymen birlesip ótkizip jatqan Qazaqstan Respýblıkasynyń monopolııaǵa qarsy qyzmetiniń 30 jyldyǵyna arnalǵan dóńgelek ústel qatysýshylaryn Qazaqstannyń monopolııaǵa qarsy organy atynan jáne óz atymnan shyn júrekten quttyqtaımyn. Týra 30 jyl buryn 1991 jylǵy 7 maýsymda sol kezdegi Qazaq KSR Prezıdentiniń № 330 Jarlyǵymen Qazaqstannyń alǵashqy monopolııaǵa qarsy organy quryldy. Bıyldan bastap Úkimettiń sheshimimen kásibı mereke retinde bekitilgen «Monopolııaǵa qarsy organ qyzmetkeri kúnine» erekshe mán beretinimizdi aıtqym keledi», - dedi QR Básekelestikti qorǵaý jáne damytý agenttiginiń tóraǵasy Serik Jumanǵarın dóńgelek ústeldiń ashylýynda.

Dóńgelek ústelge Belarýs, Reseı, Qyrǵyzstan, Armenııanyń monopolııaǵa qarsy qyzmetiniń ókilderi qatysýda.

Agenttik tóraǵasy áriptesterin mereıtoılyq datamen quttyqtady.

«Monopolııaǵa qarsy qyzmetke qatysy bar barlyq áriptesterimdi, dostarymdy ortaq merekemizben quttyqtaımyn, sondaı-aq Qazaqstannyń monopolııaǵa qarsy organynyń qurylýy men qalyptasýynyń bastaýynda turǵan adamdarǵa úlken alǵysymdy bildiremin», - dedi agenttik basshysy.