Qazaqstannyń metallýrgııa salasyndaǵy óndiris kólemi 3,1% - ǵa ósti

NUR-SULTAN. QazAqparat - 2021 jyldyń qańtar aıynyń qorytyndysy boıynsha óńdeý ónerkásibinde oń nátıje qalyptasqan. Metallýrgııada óndiris kólemi 3,1% - ǵa ósti, dep habarlaıdy QazAqparat Indýstııa jáne ınfraqurylymdyq damý mınıstrliginiń baspasóz qyzmetine silteme jasap.

Mysaly, qara metallýrgııa baǵyty boıynsha «ArselorMıttal Temirtaý» AQ-da bolat óndirisiniń 2,1% - ǵa ósýi baıqalady.

Esterińizge sala keteıik, kásiporyn jalpaq jáne surypty prokat, onyń ishinde polımer, myrysh jáne alıýmınıı jabyny bar prokat óndirisine mamandanǵan, sondaı-aq aglomerat, temir kendi jáne kómir kontsentratyn, koks, shoıyn, bolat, onyń ishinde úzdiksiz quıylǵan qańyltaqtar, shtrıps, lonjerondy jolaq, elektrmen dánekerlengen qubyrlar jáne domna jáne koksohımııalyq óndiristerdiń ilespe ónimderin óndiredi.

Sonymen qatar «Taraz metallýrgııa zaýyty» ferrosılıkomarganets óndirisin 91% - ǵa arttyrdy. Zaýyt ferroqorytpalardy, elektrod massasyn jáne fosfor ónimderin ıntegratsııalanǵan óndirýshi bolyp tabylady. Ónerkásiptik aımaq 632 ga quraıdy — bul balqytý tsehtary, ákimshilik ǵımarattar jáne qoımalar. Óndiris oshaǵynda jylyna jalpy qýattylyǵy 400 myń tonna qorytpa shyǵarýǵa baǵyttalǵan 13 pesh jumys isteıdi.

«Temirtaý elektrometallýrgııalyq kombınaty» ferroqorytpa óndirisiniń kólemin 1% - ǵa ulǵaıtty. Kompanııanyń negizgi qyzmeti marganets keni men áktas óndirý, olardan ferroqorytpalar men kaltsıı karbıdin óndirý jáne satý bolyp tabylady. Óziniń shıkizat bazasy men óndiristik qýatyna ıe zaýyt shıkizat – óndiris – daıyn ónimniń tolyq óndiristik tsıklin qurdy. Barlyq ónimniń Qazaqstan Respýblıkasynyń sáıkestik sertıfıkattary bar. Kombınat shyǵaratyn ónimniń sapasyn baqylaýdy akkredıttelgen synaq ortalyǵy júzege asyrady. Atmosferaǵa zııandy zattardyń shyǵarylýyn baqylaýdy kúzet bóliminiń attestattalǵan sanıtarııalyq zerthanasy júzege asyrady.

Tústi metallýrgııada óndiris kóleminiń ósýi 6,6% - dy qurady. Óz kezeginde «Qazaqmys Korporatsııasy» quıma altyn óndirý kólemin 52% - ǵa jáne túıirshikti kúmis óndirisin 33% - ǵa ulǵaıtty.

Sondaı-aq, «Taý-Ken Altyn» kompanııasynda tazartylǵan altyn óndirisiniń 4% - ǵa jáne tazartylǵan kúmis óndirisiniń 46,7% - ǵa óskeni baıqalady.

«Kastıng» metallýrgııalyq kompanııasy katodty mys óndirisiniń kólemin 19% - ǵa ulǵaıtty. Qaıtalama shıkizatty keshendi qaıta óńdeýdiń biregeı tehnologııalaryn ıgerip, óz ázirlemelerin paıdalana otyryp, búgingi tańda kompanııa qara jáne tústi metaldardan jasalǵan ónimderdiń keń spektrin shyǵarady: bolat daıyndamalar, usaqtaýshy sharlar men ózeksheler, armatýralyq quıma, katodty mys jáne mys buıymdary, qola, jez, alıýmınıı jáne qorǵasyn qorytpalary.