Qazaqstannyń memlekettik syrtqy qaryzy qansha

ASTANA. QazAqparat - «Astana» halyqaralyq qarjy ortalyǵy bırjasynda Euroclear júıesi arqyly teńgemen evrooblıgatsııalar shyǵarý josparlanyp otyr. Bul týraly búgin QR Úkimetiniń otyrysynda elimizdiń Qarjy mınıstri Baqyt Sultanov aıtty, dep habarlaıdy QazAqparat.

«2018 jyldyń 1 qańtarynan memlekettik borysh 13,5 trln teńgeni (40,6 mlrd AQSh dollary) nemese jalpy ishki ónimniń 26 paıyzyn qurady. 2017 jyly bıýdjetke boryshtyq júkteme kiristerdiń 15 paıyz lımıtinde 8,8 deńgeıinde qalyptasty», - dedi mınıstr.

Onyń aıtýynsha, valıýtalyq táýekelderdi nıvelırleý maqsatynda 2016-2017 jyldary memlekettik baǵaly qaǵazdardy shyǵarý ishki naryqta ǵana júzege asyryldy. Sondaı-aq 2016 jyly Memleket basshysynyń tapsyrmasyna sáıkes 2017-2019 jyldarǵa arnalǵan syrtqy qaryz alý qorjyny ońtaılandyryldy.

«Astana» halyqaralyq qarjy ortalyǵy bırjasynda Euroclear júıesi arqyly teńgemen evrooblıgatsııalar shyǵarý josparlanǵan. Qaryz alý kózderin ártaraptandyrý maqsatynda sondaı-aq, ıslam oblıgatsııalary sýkýkty shyǵarý da josparda bar», - dedi Baqyt Sultanov.
Sondaı-aq, jıynda QR Ulttyq ekonomıka mınıstri Tımýr Súleımenov Qazaqstannyń memlekettik qaryzdar deńgeıi erekshe baqylaýǵa alynatyndyǵyn atap ótti.