Qazaqstannyń Majarstanǵa eksporttaıtyn ónim quny 15,4 mln dollardy qurady
Bul týraly QR Syrtqy ister mınıstriniń orynbasary Roman Vasılenkonyń Býdapeshtke jumys saparynan málim boldy, dep habarlaıdy QazAqparat QR Syrtqy ister mınıstrliginiń baspasóz qyzmetine silteme jasap.
Baspasóz qyzmetiniń málimetterine qaraǵanda, saparbarysynda Qazaqstan men Majarstan arasyndaǵy strategııalyq áriptestikti odan ári damytý perspektıvalary, «Jańa Qazaqstandy» qurý baǵyty jáne halyqaralyq kún tártibindegi ózekti máseleler talqylandy.
Majarstannyń syrtqy saıası vedomstvosy Memlekettik hatshysynyń orynbasary Andrash Baranı R. Vasılenkomen birge eki mınıstrlik arasyndaǵy saıası konsýltatsııalardyń kezekti raýndyn ótkizdi.
Taraptar saıası, saýda-ekonomıkalyq, ınvestıtsııalyq jáne mádenı-gýmanıtarlyq salalardaǵy yntymaqtastyqtyń keń aýqymdy máselelerin talqylady. Sonymen birge ekijaqty is-sharalardyń kestesi, onyń ishinde Majarstannyń Syrtqy ekonomıkalyq baılanystar jáne syrtqy ister mınıstri Peter Sııartonyń Qazaqstanǵa jumys sapary jáne joǵary deńgeıdegi baılanystary qaraldy.
Saýda-ekonomıkalyq yntymaqtastyqqa erekshe nazar aýdaryldy. 2021 jyldyń qorytyndysy boıynsha eki el arasyndaǵy ózara saýda kólemi 138,7 mln dollardy qurap, 2020 jylǵy kórsetkishterden 19% asyp ketti. Majarstannan Qazaqstan ekonomıkasyna tikeleı ınvestıtsııalar kólemi 2005 jyldan bastap 270 mln. dollardy qurady. Qazaqstanda 30-ǵa jýyq majar kompanııasy jumys isteıdi, onyń ishinde «MOL», «Gedeon Richter», «Egis» jáne t. b. bar.
Kelissózder qorytyndysy boıynsha R. Vasılenko jáne 2015-2019 jyldary Majarstannyń Qazaqstandaǵy Elshisi retinde jumys istegen A. Baranı strategııalyq áriptestikti odan ári nyǵaıtý baǵytyna beıildiligin rastady. Dıplomattar Qazaqstan-Vengrııa qarym-qatynastary yntymaqtastyqtyń barlyq spektri boıynsha odan ári damı beretinine senim bildirdi. Aýyl sharýashylyǵyn, energetıkany, qurylysty, avtomobıl jáne hımııa ındýstrııasyn, týrızmdi, ınnovatsııalar men farmatsevtıkany qosa alǵanda, ınvestıtsııalyq yntymaqtastyqtyń perspektıvaly salalary erekshe atap ótildi.
Osy kúni R. Vasılenko eki el arasyndaǵy dıplomatııalyq qarym-qatynastardyń ornaǵanyna 30 jyl tolýyna jáne «Jańa Qazaqstandy» qurý jónindegi reformalarǵa arnalǵan «dóńgelek ústel» jumysyna qatysty.
Іs-shara qatysýshylaryna mınıstrlikter men vedomstvolar qatarynan, Syrtqy ekonomıkalyq baılanystar jáne syrtqy ister ınstıtýty, akademııalyq, saraptamalyq jáne iskerlik top ókilderine Qazaqstan men Majarstan arasyndaǵy qarym-qatynastardyń negizgi damý kezeńderi, Qazaqstandaǵy qazirgi jaǵdaı, adam quqyqtaryn qorǵaý júıesin nyǵaıtý jónindegi memlekettiń keshendi sharalary, sondaı-aq aýqymdy saıası men áleýmettik-ekonomıkalyq reformalardy iske asyrý týraly aqparat jetkizildi.
Majar spıkerleri áriptestiktiń 30 jyly ishinde qol jetkizilgen ekijaqty qarym-qatynastardyń joǵary deńgeıin atap ótti, sondaı-aq elimizdegi saıası reformalardyń jańa baǵytyna qoldaý bildirip, «Jańa Qazaqstandy» qurý jónindegi prezıdenttik baǵdarlamanyń erekshe ózektiligi men ýaqtylyǵyn atap ótti.