Qazaqstannyń mashına jasaý salasynyń ónimderi qaı elderge eksporttalady
«Búginde álemdik saýdanyń 44%-y, ıaǵnı 17,5 trln AQSh dollary mashına jasaý salasynyń ónimderine tıesili. 2018 jyldan bastap mashına jasaý ónimderi ımportynyń tómendeýi men pandemııa kezindegi logıstıka qıyndyqtaryna qaramastan, pandemııadan keıin bul úrdiste ósý baıqalyp otyr. Oǵan qosa mashına jasaý ındýstrııasyndaǵy protsesterdi tsıfrlandyrý da mańyzdy ról atqara bastady», - dedi J. Kýshýkova.
Máselen sońǵy jyly elektr qozǵaltqyshtary bar kólikterdiń halyqaralyq saýdasy 1,5 esege jýyq ósken. Álemdik satylymda elektroavtomobılder (78%), elektromopedter men velosıpedter (20%) kósh bastap tur, al elektr avtobýstardyń úlesi bar bolǵany – 3%. Qazaqstan bıylǵy 7 aıda 741,8 mln dollarǵa mashına jasaý ónimderin eksporttaǵan. Bul kórsetkish 2020 jyldyń sáıkes kezeńimen salystyrǵanda 33,6%-ǵa kóp.
«Qazaqstandyq mashına jasaý ónimderiniń negizgi naryqtary – TMD elderi men birqatar EO elderi, AQSh jáne Ulybrıtanııa. 2021 jyly ımporttaýshylardyń alǵashqy bestigine Reseı, Ózbekstan, Qyrǵyzstan, Belgııa jáne Túrikmenstan kirdi. Óndiristi arttyrý arqyly 2025 jyly mashına jasaý ónimderiniń eksportyn 2,9 mlrd AQSh dollaryna deıin jetkizemiz dep úmittenemiz», - dedi spıker.
Onyń aıtýynsha, mashına jasaý salasynda eń kóp eksporttalatyn taýar arasynda moıyntirekter bar, olardyń shamamen 93%-y eksportqa jiberiledi.
«Sonymen birge, syrtqy naryqtarda 72% eksporttalatyn otandyq elektr akkýmýlıatorlaryna jáne teń jartysy eksporttalatyn transformatorlarǵa jaqsy suranysty kórip otyrmyz. Reseı naryǵyna kelsek, ondaǵy barlyq vagon-tsısterna ımportynyń shamamen 96% – qazaqstandyq ónim. Reseılik moıyntirekter ımportynyń da shamamen 45%-yn bizdiń otandyq taýarlar quraıdy. Ózbekstan naryǵyna da jetkiziletin qazaqstandyq kondensatorlar uqsas taýarlar ımportynyń jartysynan astamyn quraıdy. Bul rette Ózbekstanmen otandyq avtomobıl jasaýdy damytý salasynda jaqsy qarym-qatynas ornaǵanyn aıtqym keledi», - dedi Janel Kýshýkova.